নগাঁও জিলাৰ কচুৱাৰ লংজাপ পঞ্চায়তত আজি তীব্ৰ উত্তেজনাপূৰ্ণ পৰিস্থিতিৰ সৃষ্টি হয় । চৰকাৰে দিয়া ৩৮০০ টকা প্ৰকৃত হিতাধিকাৰীয়ে নোপোৱাত লংজাপ গাঁও পঞ্চায়ত ঘেৰাও কৰে উত্তেজিত বানাক্ৰান্ত জনতাই । লংজাপ পঞ্চায়তৰ পশ্চিম লংকা গাঁও, সৰু শালনি আৰু মাজ লংকা গাঁও এই তিনিখন গাঁও বানৰ কৱলত থকাৰ পাছতো চৰকাৰী ৩৮০০ টকাৰ সাহাৰ্য নোপোৱাত ক্ষোভিত হৈ পৰে উত্তেজিত ৰাইজ ।
পঞ্চায়তখনৰ সভাপতি, সম্পাদকৰ লগতে সকলো কৰ্মচাৰীকে আৱদ্ধ কৰি প্ৰতিবাদ কৰে ক্ষোভিত জনতাই । পঞ্চায়তটোত তলা ওলমাই দিয়ে উত্তেজিত লোকসকলে ।
উল্লেখ্য যে, পঞ্চায়তটোৰ সভানেত্ৰী ৰেখামণি বৰাৰ পৰিয়ালৰ লোকসকলে পানী নোসোমোৱাকৈ টকা পোৱাত ক্ষোভিত হৈ পৰে উত্তেজিত লোকসকল । পঞ্চায়ত সভানেত্ৰীগৰাকীক দীৰ্ঘ সময় ধৰি আৱদ্ধ কৰি ৰাখে উত্তেজিত জনতাই ।
অৱশ্যে পাছত সুযোগ বুজি পলায়ন কৰে সভানেত্ৰীগৰাকীয়ে । পাছত ঘটনাস্থলীত কচুৱা আৰক্ষী উপস্থিত হৈ পৰিস্থিতি নিয়ন্ত্ৰণৰ কৰে । প্ৰতিবাদী ৰাইজে এই সংক্ৰান্তত কচুৱা আৰক্ষী থানাত এক গোচৰ ৰুজু কৰাৰ লগতে নগাঁও জিলাৰ উপায়ুক্ত আৰু মুখ্যমন্ত্ৰী ড° হিমন্ত বিশ্ব শৰ্মাৰ তাৎক্ষণিক হস্তক্ষেপ দাবী কৰে ।