অর্থনৈতিক আৰু ৰাজনৈতিক অস্থিৰতাৰ মাজতে শ্রীলংকাৰ ৰাষ্ট্ৰপতিৰ দায়িত্ব গ্ৰহণ কৰিয়েই কঠোৰভাৱে আন্দোলন দমনত সক্রিয় হ’ল ৰনিল বিক্রমসিংঘে । বৃহস্পতিবাৰে নিশা ৰাষ্ট্ৰপতি পদত শপতগ্ৰহণ কৰিছিল ৰনিলে । তাৰ কিছু ঘণ্টা পাছতেই কলম্বোত আন্দোলনকাৰীৰ শিবিৰত অভিযান চলায় লংকা ফৌজে ।
মাজ নিশা কলম্বোত শ্রীলংকা সেনাৰ সেই অভিযানৰ কিছু ভিডিঅ’ ইতিমধ্যে সেই দেশৰ সংবাদমাধ্যমত প্রচাৰ কৰিছে । অৱশ্যে ভিডিঅ’ত দেখা গৈছে, ৰাজধানী চহৰৰ গালে ফেছ অঞ্চলত অৱস্থানকাৰীসকলৰ বেৰিকেড ভাঙি দিছে সেনাই । তেওঁলোকৰ তম্বুবোৰ উফৰাই দিয়া হৈছে । বিক্ষোভকাৰীসকলৰ স’তে সেনাৰ সংঘর্ষৰ ভিডিঅ’ও দেখা গৈছে ।
শাসক দল এছএলপিপি-ৰ নেতা তথা দেশৰ প্রাক্তন আৰু পলাতক ৰাষ্ট্ৰপতি গোতাবায়া ৰাজাপক্ষৰ অনুগত সংসদৰ সদস্যসকলৰ ভোটতেই ৰাষ্ট্ৰপতি নির্বাচিত হৈছে ৰনিল । সেয়ে তেওঁৰ বিৰুদ্ধে ক্রমাগত মাত মাতিছে আন্দোলনকাৰীসকলে । যদিও বৃহস্পতিবাৰে শপতগ্ৰহণ কৰাৰ পাছত ৰনিলে কয়, “মই ৰাজাপক্ষৰ বন্ধু নহয়, শ্রীলংকাৰ জনগণৰ বন্ধু ।” শুকুৰবাৰে ৰনিলৰ নেতৃত্বত শ্রীলংকাৰ পৰৱর্তী মন্ত্রীসভা গঠিত হ’ব ।