Garakhia Than Dol Mahotsav :
নগাঁও জিলাৰ জামুগুৰিৰ ৩৫৫ বছৰীয়া ঐতিহ্যমণ্ডিত গৰখীয়া গোঁসাই থানত এইবাৰ ৩০ সংখ্যক বৰ্ষৰ বাবে অনুষ্ঠিত হ’ব দৌল উৎসৱ । আগন্তুক ৬ মাৰ্চৰ পৰা চাৰিদিনীয়াকৈ অনুষ্ঠিত হ’বলগীয়া এই দৌল উৎসৱৰ অনুষ্ঠানৰ আজি কাৰ্যসূচী উন্মোচন কৰা হয় ।
থান প্ৰাংগনত দিনৰ ১১ বজাত এই কাৰ্যসূচী উন্মোচন কৰে প্ৰবীণ অনাতাঁৰ শিল্পী গম্ভীৰ নাথে । ১৯৯৩ চনৰে পৰা ক্ৰমাগতভাৱে জামুগুৰিৰ সাৰ্বজনীন গৰখীয়া থানত উদযাপন কৰি অহা এই দৌল উৎসৱৰ এইবাৰৰ কাৰ্যসূচীৰ অংশৰূপে ৬ মাৰ্চত গছপুলি ৰোপন, ধৰ্মধ্বজা উত্তোলন,কীৰ্ত্তন পাঠ,নাম-প্ৰসংগ,শিশু কৃষ্ণ নৃত্য প্ৰতিযোগিতা আৰু মঙ্গল ধ্বনি প্ৰদান অনুষ্ঠান অনুষ্ঠিত হ’ব ।
৭ মাৰ্চত মণিকূট আৰু দৌল মন্দিৰত বন্তি প্ৰজ্বলন,অঞ্চলৰ ২৯ টাকৈ নামঘৰৰ পৰা ধৰ্ম ধ্বজা আৰু পানীৰ কলচি লৈ উৎসৱস্থলীলৈ যাত্ৰা,দিহানাম,বঁটা প্ৰদানৰ অনুষ্ঠান আৰু “মচুকুণ্ড ৰজাৰ কৃষ্ণ দৰ্শন” শীৰ্ষক ভাওনা অনুষ্ঠিত হ’ব ।
তৃতীয় দিনৰ কাৰ্যসূচী অনুসৰি ৮ মাৰ্চত হোলী খেলা আৰু শোভাযাত্ৰা,জনজাতীয় লোকবাদ্য দলৰ সাংস্কৃতিক অনুষ্ঠান আদি অনুষ্ঠিত হ’ব । ইপিনে দৌল উৎসৱৰ অন্তিম দিনৰ কাৰ্যসূচী অনুসৰি ৯ মাৰ্চত ময়ূৰ পঙ্খী ৰথত দৌল গোবিন্দ গোঁসাই ভ্ৰমণ,কীৰ্ত্তন পাঠ,দিহানাম আদি অনুষ্ঠিত হ’ব ।
আজি থান প্ৰাংগণত এক সংবাদমেল সম্বোধন কৰি দৌল উৎসৱৰ প্ৰস্তুতিৰ বিষয়ে অৱগত কৰে উদ্যোক্তাসকলে । এই চাৰিদিনীয়া দৌল উৎসৱৰ কাৰ্যসূচীৰ সফল ৰূপায়নৰ বাবে শুকুৰাম বৰুৱাক সভাপতি আৰু অনিল চন্দ্ৰ নাথক সম্পাদক হিচাপে লৈ এখন উদযাপন সমিতি আৰু ছখনকৈ উপ সমিতিও গঠন কৰা হৈছে ।
উল্লেখ্য যে,শতিকা প্ৰাচীন এই থানখনি দৰ্শন কৰিবলৈ অসমৰ ভিন্ন প্ৰান্তৰ ভক্ত-দৰ্শনাৰ্থী আহে । আজিৰ পৰা ৩৫০ বছৰৰো আগতে গৰু চৰাই থাকোতে কেইজনমান গৰখীয়া ল’ৰাই হেৰাই পাইছিল এটি পিতলৰ বংশী গোপালৰ মূৰ্ত্তি ।
মূৰ্ত্তি হেৰাই পোৱা স্থানতেই প্ৰতিষ্ঠা কৰা হৈছিল এই থান খনি । সেয়ে থান খনি গৰখীয়া থান নামেৰে জনাজাত হয় । মহিমামণ্ডিত এই থানখনিত নিঃসন্তান লোকে শৰাই আগবঢ়ালে মনৰ অভীপ্সা পূৰণ হয় বুলি এক জনবিশ্বাসে গা কৰি উঠিছে ।
ইয়াৰোপৰি স্বকীয় মহিমাৰে উজ্বলি উঠা এই থানখনিত বিভিন্ন লোকে মনোকামনা পূৰণৰ বাবে সেৱা আগবঢ়াই ফল লাভ কৰিছে বুলিও সৰ্বজনবিদিত ।
ঐতিহ্যমণ্ডিত এই থানখনিৰ দৌল উৎসৱৰ চাৰিওদিনৰ কাৰ্যসূচীতে সকলো ৰাইজৰ উপস্থিতি আৰু সহায়-সহযোগিতা আন্তৰিকতাৰে কামনা কৰিছে থান পৰিচালনা সমিতিৰ সভাপতি থানেশ্বৰ নাথ আৰু সম্পাদক পোৱাল চন্দ্ৰ নাথে ।