Jua Protest:
মহানগৰীত বুধবাৰে এক ৰাজনৈতিক অনুষ্ঠানত বাতৰি সংগ্ৰহৰ বাবে উপস্থিত হোৱা কৰ্তব্যৰত সাংবাদিকৰ ওপৰত আৰক্ষীয়ে কন্দুৱা গেছ প্ৰয়োগ কৰা কাৰ্যক জাৰ্নেলিষ্ট ইউনিয়ন অৱ আসাম (জুৱা) এ তীব্ৰ গৰিহণা দিয়ে। অতি দূৰ্ভাগ্যজনক বিষয় যে সাংবাদিক আৰু ভিডিঅ’-সাংবাদিকসকল সমবেত হোৱা স্থানত কন্দুৱা গেছৰ মুকলি ব্যৱহাৰ কৰা হয়। এই ঘটনাত কেবাজনো সাংবাদিক আহত হোৱাৰ লগতে চিকিৎসা গ্ৰহণ কৰিবলগীয়া হয়।
এক বিবৃতিত জাৰ্নেলিষ্ট ইউনিয়ন অৱ আসাম (জুৱা)ৰ সভানেত্ৰী চেমিম চুলতানা আহমেদ আৰু সাধাৰণ সম্পাদক ধনজিৎ কুমাৰ দাসে কয় যে ৰাজ্যৰ বিভিন্ন প্ৰান্তত কৰ্তব্যৰত অৱস্থাত সাংবাদিকসকলে এনে ঘটনাৰ বলি হৈছে। ই অতি উদ্বেগজনক। এনে ঘটনাৰ বাৰম্বাৰ পুনৰাবৃত্তি যাতে নহয় তাৰ প্ৰতি সতৰ্ক হবলৈ জুৱাই চৰকাৰ – প্ৰশাসনক আহ্বান জনায়।