Telangana:
১২ দিন পাৰ হৈ গ’ল ! কিন্তু সন্ধান ওলোৱা নাই তেলেংগানাৰ সুৰংগত আৱদ্ধ হোৱা আঠ শ্ৰমিকৰ আৰু অভিযন্তা।তেওঁলোক জীৱিত নে মৃত, কি অৱস্থাত আছে সেয়া এতিয়াও পোহৰলৈ অহা নাই । আশাৰ পোহৰ প্ৰায় নুমাই গৈছে। সেই পৰিস্থিতিত এইবাৰ উদ্ধাৰ অভিযানত যোগ দিলে কেৰালা আৰক্ষীৰ বিশেষভাৱে প্ৰশিক্ষণপ্ৰাপ্ত কুকুৰে।
বৃহস্পতিবাৰে পুৱা কেৰালা চৰকাৰে জনাই যে মৃতদেহ বিচাৰি প্ৰশিক্ষণ প্ৰাপ্ত কুকুৰ কেইটা ইতিমধ্যে তেলেংগানালৈ ৰাওনা হৈছে। ৰাজ্য আৰু ৰাষ্ট্ৰীয় দুৰ্যোগ সঁহাৰি বাহিনীৰ (এনডিআৰএফ) যৌথ অনুৰোধত বিশেষ আৰক্ষী কুকুৰ কেইটা কেৰেলালৈ প্ৰেৰণ কৰা হৈছে।
আনহাতে, ৰাষ্ট্ৰীয় দুৰ্যোগ সঁহাৰি বাহিনীৰ এগৰাকী বিষয়া প্ৰসন্ন কুমাৰে বিগত সোমবাৰে জনাই যে, আৱদ্ধ শ্ৰমিকসকলৰ সন্ধান বিচাৰি দিনে নিশাই ১২টা সংস্থাই কাম কৰি আছে । ৰাজ্য আৰু কেন্দ্ৰীয় চৰকাৰে সমগ্র দেশৰ পৰা বিভিন্ন বিশেষজ্ঞক প্ৰেৰণ কৰিছে। কিন্তু হেজাৰ চেষ্টাৰ পাছতো এতিয়ালৈকে শ্ৰমিকসকলৰ ওচৰলৈ যোৱাটো সম্ভৱ হোৱা নাই। সুৰংগটোত জমা হোৱা পানী আৰু বোকাৰ স্তৰৰ বাবে, শ্ৰমিকসকল ওচৰত উপস্থিত হ’ব পৰা নাই ।
বিগত ২২ ফেব্ৰুৱাৰীত, তেলেংগানাৰ ৪৪ কিলোমিটাৰ দীঘল শ্ৰীশৈলম সুৰংগৰ এটা অংশ পুৱা প্ৰায় ৮.৩০ বজাত খহি পৰে। তাতে ১৩.৫ কিলোমিটাৰ ভিতৰত আৱদ্ধ হৈ পৰে আঠজন শ্ৰমিক। তেঁওলোকৰ উদ্ধাৰৰ বাবে প্ৰায় ৫০০ উদ্ধাৰকাৰীয়ে কাম কৰি আছে। আজি ১২ টা দিন ধৰি বহুতো প্ৰচেষ্টা কৰা হৈছে।
কিন্তু শ্ৰমিকসকলৰ অৱস্থান এতিয়াও জনা হোৱা নাই। আজিলৈকে তেওঁলোকৰ পৰা কোনো সঁহাৰি পোৱা নাই । ইফালে সময় যোৱাৰ লগে লগে উদ্বেগ বৃদ্ধি পাইছে যদিও উদ্ধাৰকাৰীসকলে আশা এৰি দিয়া নাই।