Gaza: নিশাটো গাজাত আক্ৰমণ চলালে ইজৰাইলে। স্থানীয় প্ৰশাসনৰ সূত্ৰই দাবী কৰিছে যে দেওবাৰেও এই আক্ৰমণ অব্যাহত আছে। প্ৰশাসনে এই আক্ৰমণত শিশু আৰু মহিলাসহ ১০ জন লোক নিহত হোৱা বুলিও দাবী কৰে।
সূত্ৰ অনুসৰি খান ইউনিছত তীব্ৰ আক্ৰমণ সংঘটিত হয়। শৰণাৰ্থী শিবিৰতো আক্ৰমণৰ অভিযোগ উত্থাপন হৈছে। অৱশ্যে ইজৰাইলে সাধাৰণ নাগৰিকক আক্ৰমণ কৰা বুলি অস্বীকাৰ কৰিছে।
তেওঁলোকৰ দাবী, এই আক্ৰমণ সন্ত্ৰাসবাদী ঘাটিৰ লক্ষ্যৰে কৰা হৈছিল। ইয়াৰ বিপৰীতে গাজাত সাধাৰণ নাগৰিকৰ মৃত্যুৰ বাবে সশস্ত্ৰ বিদ্ৰোহী সংগঠন হামাছ দায়ী বুলি দাবী কৰে।
ইজৰাইলে গাজাক চাৰিওফালৰ পৰা আৱদ্ধ কৰিছে। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে হামাছৰ ওপৰত হেঁচা প্ৰয়োগ কৰিছে। ১০ সপ্তাহ ধৰি ঘেৰাও কৰি আছে গাজা।
উল্লেখ্য যে,তাত খাদ্য আৰু ঔষধকে ধৰি অত্যাৱশ্যকীয় সামগ্ৰী প্ৰৱেশ কৰিব পৰা নাই বুলি অভিযোগ উত্থাপন হৈছে।
ইয়াৰ ফলস্বৰূপে, বিভিন্ন সূত্ৰৰ মতে গাজাৰ ভিতৰৰ পৰিস্থিতি ভয়ংকৰ হৈ পৰিছে।
প্ৰসংগক্ৰমে ইজৰাইলৰ সেনাই মাৰ্চ মাহৰ আৰম্ভণিতে গাজাত হামাছ বিৰোধী অভিযান আৰম্ভ কৰি যুদ্ধবিৰতি ভংগ কৰিছিল। ৰাষ্ট্ৰসংঘৰ পেলেষ্টাইন শৰণাৰ্থীসকলৰ বাবে ৰাষ্ট্ৰসংঘৰ সাহায্য আৰু কৰ্ম সংস্থাই (UNRWA) এপ্ৰিলৰ আৰম্ভণিতে প্ৰকাশ কৰিছিল যে,১৮ মাৰ্চৰ পৰা প্ৰতিদিনে ঘেৰাও কৰা গাজাত কমেও ১০০ টা পেলেষ্টাইনী শিশুৰ মৃত্যু হৈছে।
বিগত দুই মাৰ্চৰ পৰা টেল আভিভে গাজাত কোনো ধৰণৰ মানৱিক সাহায্য বা সাহায্য প্ৰৱেশ কৰিবলৈ দিয়া নাই।ফলত খাদ্য আৰু পানীয়ৰ ভয়ংকৰ সংকটৰ সৃষ্টি হৈছে।
প্ৰসংগক্ৰমে ২০২৩ চনৰ সাত অক্টোবৰত হামাছৰ আক্ৰমণৰ পাছত ইজৰাইলী সেনাই গাজা আক্ৰমণ কৰে।তাৰ পাছত দক্ষিণে, খান ইউনিছ আৰু ৰাফাহত অবিৰত আক্ৰমণ অব্যাহত থাকে।