Iran Israel Conflict: আঠ দিন ধৰি ইৰান আৰু ইজৰাইলৰ মাজত যুদ্ধ অব্যাহত আছে। উভয় দেশে পৰস্পৰৰ বিৰুদ্ধে এই যুদ্ধত ক্ষেপণাস্ত্র, ড্র’ন আৰু যুঁজাৰু জেট বিমান ব্যৱহাৰ কৰিছে। ইজৰাইলে গাজাত হামাছৰ বিৰুদ্ধে যুদ্ধ অব্যাহত ৰখাৰ মাজতে ইৰানত আক্ৰমণ আৰম্ভ কৰিছিল।
এই যুদ্ধত ইজৰাইলে দৈনিক লক্ষাধিক ডলাৰ ব্যয় কৰিব লগা হৈছে। এক প্রতিবেদনৰ তথ্য অনুসৰি, ইৰানৰ বিৰুদ্ধে যুদ্ধত ইজৰাইলে প্রতিদিনে গড়ে ৬২ বিলিয়ন টকা ব্যয় কৰিব লগা হৈছে। ইৰানৰ বিৰুদ্ধে এই যুদ্ধ ইজৰাইলৰ বাবে যথেষ্ট ব্যয়বহুল হৈছে।
বাইনেট নিউজৰ বাতৰিত সামৰিক বিশেষজ্ঞই দাবী কৰা অনুসৰি, ইৰানৰ বিৰুদ্ধে ইজৰাইলে আৰম্ভ কৰা সামৰিক অভিযানত প্রথম ৪৮ ঘণ্টাত ইজৰাইলে ১.৪ বিলিয়ন ডলাৰ অর্থাৎ ১২৫ বিলিয়ন টকা ব্যয় কৰিব লগা হৈছিল। দিন অতিবাহিত হোৱাৰ লগে লগে ইজৰাইলৰ যুদ্ধ ব্যয় বৃদ্ধি পাইছে।
ইজৰাইলে এই মুহূৰ্তত ইৰানৰ বিৰুদ্ধে অব্যাহত ৰখা সামৰিক অভিযানত দৈনিক ৭২৫ নিযুত ডলাৰ অৰ্থাৎ ৬২ বিলিয়ন টকা ব্যয় কৰিব লগা হৈছে। কেৱল জেট বিমানৰ ইন্ধন আৰু অস্ত্ৰত ইজৰাইলে প্ৰতিদিনে প্রায় ৩০০ নিযুত ডলাৰ অৰ্থাৎ ২৬ বিলিয়ন টকা ব্যয় কৰিছে।
ইমান বৃহৎ ধন ব্যয়ৰে ইৰানৰ বিৰুদ্ধে ইজৰাইলে কিমানদিনলৈ এই যুদ্ধ অব্যাহত ৰাখিব পাৰিব বুলি সামৰিক বিশেষজ্ঞই সন্দেহ প্রকাশ কৰিছে। ইৰানৰ বিৰুদ্ধে এই সামৰিক অভিযান ইজৰাইলৰ সংস্থাও অৰ্থনীতিৰ বাবে এক ভয়াৱহ বোজাত পৰিণত হোৱাৰ সম্ভাৱনা আছে বুলি সামৰিক বিশেষজ্ঞই মন্তব্য কৰিছে।