PM Modi: দেওবাৰে ইৰাণৰ তিনিটা পাৰমাণৱিক কেন্দ্ৰত লক্ষ্য কৰি আক্ৰমণ চলায় আমেৰিকাই । পশ্চিম এছিয়াৰ সংঘাতৰ পৰিস্থিতি আৰু অধিক অৱনতি ঘটিছে।
ইউৰোপীয় সংঘৰ দেশসমূহে ইৰাণ আৰু ইজৰাইল দুয়োখন দেশকে এই সংঘাত বন্ধ কৰি আলোচনাৰ বহিবলৈ আহ্বান জনাইছে।
ইফালে, দেওবাৰে বিয়লি ভাৰতৰ প্ৰধানমন্ত্ৰী নৰেন্দ্ৰ মোদীয়ে ইৰাণৰ ৰাষ্ট্ৰপতি মাছুদ পাঝোকৰ স’তে ফোনযোগে বাৰ্তালাপ কৰে।
ইৰাণৰ ৰাষ্ট্ৰপতিৰ স’তে হোৱা আলোচনাৰ অন্তত মোদীয়ে নিজৰ এক্স হেণ্ডেলত লিখিছে,আমি বৰ্তমানৰ পৰিস্থিতিৰ বিষয়ে বিতংভাৱে আলোচনা কৰিছোঁ। শেহতীয়াকৈ উত্তেজনা বৃদ্ধি পোৱাত গভীৰ উদ্বেগ প্ৰকাশ কৰিছোঁ। তাৎক্ষণিকভাৱে তীব্ৰতা হ্ৰাস আৰু কূটনীতি আগুৱাই নিয়াৰ আহ্বান জনাইছো। শান্তি, নিৰাপত্তা আৰু স্থিতিশীলতা দ্ৰুততাৰে পুনৰুদ্ধাৰৰ আহ্বান জনাইছো।”
ইৰাণ-ইজৰাইল সংঘাতৰ মাজতে ভাৰতীয়সকলক ঘূৰাই অনাৰ উদ্যোগ লৈছিল কেন্দ্ৰীয় চৰকাৰে। ভাৰতৰ অনুৰোধতহে ইৰাণে নিজৰ আকাশমাৰ্গ মুকলি কৰিলে।
ইতিমধ্যে ইৰাণত থকা ছাত্ৰ-ছাত্ৰীকে ধৰি ভাৰতীয়সকলক ‘অপাৰেচন সিন্ধু’ৰ জৰিয়তে ঘূৰাই অনা হৈছে।কূটনৈতিক মহলে অনুমান কৰে যে পশ্চিম এছিয়াৰ অৱনতি ঘটা পৰিস্থিতিৰ মাজতে ইৰাণৰ ৰাষ্ট্ৰপতিৰ স’তে মোডীৰ আলোচনা যথেষ্ট তাৎপৰ্যপূৰ্ণ।