Illegal sand smuggling in Barhola:
প্রশাসনৰ নীতি-নির্দেশনাক তিলমানো গুৰুত্ব নিদি বৰহোলা চহৰৰ মাজেৰে দৈনিক অবৈধ বালি ভর্তি ট্রেক্টৰৰ দৌৰাত্ম্য বৃদ্ধি পোৱাৰ গুৰুতৰ অভিযোগ উত্থাপন হৈছে। দৈনিক তিনি-চাৰিখন ট্রেক্টৰে অবৈধভাবে বালি কঢ়িয়াই থকাৰ সমান্তৰালকে চহৰখনৰ মাজেৰে তীব্ৰ বেগত অহা-যোৱা কৰাৰ ফলত স্থানীয় পথচাৰী সকলকো আতংকিত কৰি তুলিছে।
উল্লেখ্য যে তিতাবৰৰ বন বিভাগ আৰু স্থানীয় বৰহোলা আৰক্ষীৰ ৰহস্যজনক স্থিতিৰ পৰিপ্ৰেক্ষিততে চহৰখনৰ মাজেৰে অবৈধভাবে বালি ভর্তি ট্ৰেক্টৰৰ দৌৰাত্মা বৃদ্ধি পোৱাৰ অভিযোগ উঠিছে। আৰক্ষী, বন বিভাগক অংগুষ্ঠ প্ৰদৰ্শন কৰি অবৈধ বালি ভর্তি ট্রেক্টৰৰ এনে সৰবৰাহে প্ৰশাসনৰ সোপাটিলা নীতিক স্পষ্ট কৰি তুলিছে। বন বিভাগৰ কোনো বৈধ অনুমতি নোলোৱাকৈ এক্সকেভেটৰে নৈ, জান, জুৰিৰ মাটি কাটি দিন-দুপৰতে একাংশ লোকে অবৈধ ব্যৱসায়ৰ বেহা পাতিছে বুলিও এক সূত্রই দাবী কৰিছে।
টেক্টৰসমূহৰ টেইলাৰখনৰ পিছফালৰ ঢাকনখন খুলি বালি ভৰ্তি কৰি তীব্র গতিত অহা-যোৱা কৰি থকাৰ ফলত ৰাইজে ৰাস্তা ইপাৰ-সিপাৰ হোৱা আৰু গাড়ী চলোৱাৰ ক্ষেত্ৰত বাৰুকৈয়ে আতংকিত হৈ পৰা বুলি ক্ষোভেৰে ব্যক্ত কৰিছে। পৰিতাপৰ কথা যে এনেবোৰ অবৈধ বালি কঢ়িওৱা ট্ৰেক্টৰৰ সৰবৰাহে বৰহোলা চহৰখনত প্ৰশাসনৰ ভূমিকাক একপ্ৰকাৰ ভেঙচালি কৰিছে।
ইফালে, নামতহে থকা তিতাবৰৰ বন বিভাগৰ দায়িত্বজ্ঞানহীনতাৰ বাবেই বৰহোলাৰ দৰে ব্যস্ততাপূর্ণ চহৰত অবৈধ কাৰুকাৰ্য দিনকদিনে বৃদ্ধি পাইছে বুলি সচেতন ৰাইজে জানিবলৈ দিছে। সংবাদ মাধ্যমত এটা বাতৰি প্ৰকাশ হোৱাৰ পাছত দুই-এদিন বন্ধ হৈ থাকে যদিও কাৰোবাৰ কৃপাত ৰহস্যজনকভাৱে পুনৰ অবৈধ সৰবৰাহ আৰম্ভ হয়।
একাংশ ডাম্পাৰ চালকৰ কাৰুকাৰ্যয়ো দীর্ঘদিনে সৰ্বসাধাৰণ ৰাইজক অতিষ্ঠ কৰি আহিছে। বৰহোলা চহৰৰ মাজেৰে দৈনিক সৰবৰাহ হোৱা অবৈধ বালি ভৰ্তি ট্ৰেক্টৰ, ডাম্পাৰ আদিৰ বিৰুদ্ধে শীঘ্ৰে কঠোৰ পদক্ষেপ গ্রহণ কৰিবলৈ প্ৰশাসনৰ ঊর্ধ্বতন কর্তৃপক্ষক স্থানীয় ৰাইজে দাবী জনাইছে।