Lat Mandal arrested for taking bribe:
ইজনৰ পাচত সিজনকৈ চৰকাৰী বিষয়া- কৰ্মচাৰী ঘোচ লৈ দুৰ্নীতি নিবাৰকৰ জালত পৰাৰ পিছতো যেন শিকনি হোৱা নাই একাংশ ঘোচখোৰৰ ৷ উৎকোচ লৈ পুনৰ হাত দাঙিলে আৰু এজন চৰকাৰী কৰ্মচাৰীয়ে ৷ বৰপেটাৰ ৰাজহ চক্ৰ বিষয়াৰ কাৰ্যালয়ত এজন লোকৰ পৰা উৎকোচ লৈ শুকুৰবাৰে ধৰা পৰে এজন লাট মণ্ডল ৷
দুৰ্নীতি নিবাৰক আৰু তদাৰকী শাখাৰ এটা দলে অভিযান চলাই হাতেলোটে ধৰা পেলোৱা লাট মণ্ডলজনৰ নাম আনোৱাৰ হুছেইন। অভিযোগ অনুসৰি কয়াকুছিৰ খাবলাৰ ভিঠা গাঁৱৰ আব্দুল বাতেন নামৰ এজন লোকৰ ভূমি সংক্ৰান্তীয় কাম কৰি দিয়াৰ বিনিময়ত মণ্ডলজনে প্ৰথমে বিশ হাজাৰ টকা উৎকোচ দাবী কৰে। অন্যথা কাম কৰা নহয় বুলি স্পষ্ট কৰি দিয়ে ।
উৎকোচ আদায় নিদিয়াৰ বাবেই কামটো দীৰ্ঘসময় ধৰি পেলাই থয় লাট মণ্ডলজলে । অৱশেষত আব্দুল বাতেনে দুৰ্নীতি নিবাৰক আৰু তদাৰকী শাখাত এই সন্দৰ্ভত এক অভিযোগ দাখিল কৰে। সেই অভিযোগৰ ভিত্তিত শাখাটোৰ এটা দলে শুকুৰবাৰে দুপৰীয়া ৰাজহ চক্ৰ বিষয়াৰ কাৰ্যালয়ত অভিযান চলাই ।
পৰিকল্পনা অনুসৰি অভিযোগকাৰীয়ে লাট মণ্ডলজনক উৎকোচৰ এটা অংশ আদায় দিয়ে। কাৰ্যালয়টোৰ চৌহদত থকা কেণ্টিনত সেই ধন লাট মণ্ডলজনে গ্ৰহণ কৰাৰ সময়তে পূবৰে পৰা খাপ পিটি থকা অভিযানকাৰী দলে তেওঁক হাতেলোটে কৰায়ত্ত কৰে। ইতিমধ্যে লাট মণ্ডলজনক গ্ৰেপ্তাৰ কৰা হৈছে।
আনহাতে অধিক জেৰাৰ বাবে ঘোচখোৰ মণ্ডলজনৰ গুৱাহাটীলৈ অনাৰ ব্যৱস্থা কৰিছে দুৰ্নীতি নিবাৰক আৰু তদাৰকী শাখাৰ অভিযানকাৰী দলটোৱে ৷