পহলগামত সংঘটিত সন্ত্ৰাসবাদী আক্ৰমণৰ বিৰুদ্ধে আন এখন দেশৰ বাৰ্তা, ‘আমি ভাৰতৰ স’তে আছোঁ।’

Jammu and Kashmir:✒️জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ বিৰোধিতাৰ বাৰ্তা প্ৰেৰণ কৰিছে আন এখন দেশে। ভাৰত ভ্ৰমণ কৰা তেওঁলোকৰ বৈদেশিক মন্ত্ৰীয়ে কয় যে তেওঁলোকে সন্ত্ৰাসবাদৰ বিৰুদ্ধে যুঁজত ভাৰতৰ কাষত থিয় দিছে।

শেহতীয়াকৈ ভাৰত ভ্ৰমণ কৰা দক্ষিণ কোৰিয়াৰ বৈদেশিক মন্ত্ৰী চো হুইনে ভাৰতৰ বৈদেশিক পৰিক্ৰমা মন্ত্ৰী এছ জয়শংকৰক সাক্ষাৎ কৰে। সংবাদ সংস্থাৰ স’তে হোৱা এক সাক্ষাৎকাৰত তেওঁ পহলগাম আক্ৰমণ সন্দৰ্ভত নিজৰ মন্তব্য আগবঢ়ায়।

তেওঁ কয়,”এই বিষয়ত আমাৰ স্থিতি অতি শক্তিশালী আৰু দৃঢ়। আমি যিকোনো সন্ত্ৰাসবাদী আক্ৰমণৰ বিৰোধী। আমি ভাৰত চৰকাৰ আৰু ভাৰতৰ জনসাধাৰণৰ স’তে থিয় দিছো।”

জয়শংকৰে হ্যুনৰ স’তে দ্বিপাক্ষিক বৈঠকত মিলিত হয়। সন্ত্ৰাসবাদৰ বিৰুদ্ধে ভাৰতৰ স্থিতি সমৰ্থন কৰাৰ বাবেও তেওঁক ধন্যবাদ জ্ঞাপন কৰে। পাকিস্তানৰ স’তে চাৰিদিনীয়া সংঘৰ্ষৰ অন্তত ভাৰত চৰকাৰে বিভিন্ন দেশলৈ সৰ্বদলীয় প্ৰতিনিধি দল প্ৰেৰণ কৰিছিল।

এই গোটসমূহৰ উদ্দেশ্য আছিল পাকিস্তানৰ বিৰুদ্ধে ভাৰতীয় সামৰিক অভিযান ‘অপাৰেচন সিন্দুৰ’ প্ৰচাৰ কৰা। দক্ষিণ কোৰিয়ালৈও গৈছিল এটা প্ৰতিনিধি দল।

জয়শংকৰে কয়,পহলগামত সংঘটিত সন্ত্ৰাসবাদী আক্ৰমণৰ বিৰোধিতা কৰাৰ বাবে কোৰিয়া চৰকাৰৰ প্ৰতি কৃতজ্ঞতা জ্ঞাপন কৰিব বিচাৰিছো। চিউলত সেই দেশৰ বিষয়াসকলৰ স’তে আমাৰ সৰ্বদলীয় প্ৰতিনিধি দলৰ বৈঠক বহুত ভালেই হৈছিল। “