West karbianglong: তুলিৰামৰ কাৰ্বি আংলঙত নৰকযন্ত্ৰণা দুৰ্গমবাসীৰ, অসুস্থ হ’লেও ৰোগীক চিকিৎসালয়লৈ আনিবলগীয়া হয় সাঙিত তুলি

West karbianglong:

নৰকসদৃশ অঞ্চলৰ নৰকযন্ত্ৰণা, কাৰ্বি আংলঙৰ পাহাৰবাসী ৰাইজে হয়তো আজিও বুজি নাপায় উন্নয়ন আৰু বিকাশ কি? কাৰণ উন্নয়ন আৰু বিকাশে আজিও স্পৰ্শ কৰিব পৰা নাই দুৰ্গম পাহাৰীয়া অঞ্চলবোৰক। পশ্চিম কাৰ্বি আংলং তথা কাৰ্বি পৰিষদীয় আমৰেং সমষ্টিৰ ৰংমানপী গাঁৱৰ সুচল বাটপথ, দলং আদিৰ অভাৱত এগৰাকী ৰোগীয়া মহিলাক সাঙিত তুলি ঘন হাবিৰ লুংলুঙীয়া বাটেৰে নিব লগা হৈছে চিকিৎসালয়লৈ।

উন্নয়ন আৰু বিকাশৰ অভাৱত এক প্ৰকাৰ বনবাসী জীৱন কটোৱা ৰাইজে তথা ভুক্তভোগীৰ পৰিয়ালে আনকি মৰণক শৰণ দি মৰ সাহেৰে আমৰেং নদীৰ লগতে আম-ই নদীৰ ওপৰত সাজি ৰখা বাঁহৰ সাঁকো পাৰ হৈ চাতি তিচ্ছপী নামৰ ৰোগীয়া মহিলা গৰাকীক নিবলগা হৈছে জেৰিকীণ্ডিঙস্থিত চিকিৎসালয়লৈ। ছবিয়ে কথা কয়–এইয়াই হৈছে কাৰ্বি আংলঙত হোৱা উন্নয়ন আৰু বিকাশৰ নমুনা আৰু বাস্তৱ ছবি। মুঠতে আজিও উন্নয়ন আৰু বিকাশৰ বিপৰীত দিশত অৱস্থান কৰি আছে কাৰ্বি আংলঙৰ বহু এনেবোৰ পাহাৰীয়া অঞ্চল। পৰিপ্ৰেক্ষিতত সৃষ্টি হৈছে প্ৰতিক্ৰিয়াও। এইয়াই হৈছে তুলিৰাম ৰংহাঙ নেতৃত্বাধীন কাৰ্বি আংলং স্বায়ত্ত্বশাসিত পৰিষদৰ উন্নয়নৰ ফোপোলা ছবি ৷