৫০ বছৰৰ সৰু এগৰাকী যুৱতীক জীৱনসংগীৰূপে বিচাৰে। তাৰ বাবদ দুই কোটি টকা মূল্য নির্ধাৰণ কৰিছে ৭৪ বছৰ বয়সীয়া এজন বৃদ্ধই। তোলপাৰ লগোৱা এই কাণ্ড ঘটিছে ইণ্ডোনেছিয়াত। প্রাপ্ত তথ্য অনুসৰি, উক্ত বৃদ্ধই এগৰাকী ২৪ বছৰীয়া যুৱতীক বিয়া কৰাইছে। লগতে ‘কইনাৰ মূল্য’ৰূপে যুৱতীৰ হাতত তুলি দিছে প্রায় দুই কোটি টকা।
‘ছাউথ চাইনা মর্ণিং প’ষ্ট’ কাকতে জনাইছে যে ৫০ বছৰৰ সৰু পাত্ৰীৰ স’তে বিবাহ সম্পন্ন কৰাৰ বাবে তাৰমান নামৰ ৭৪ বছৰীয়া বৃদ্ধজনে বিৰাট আয়োজন কৰিছিল। পূব জাভাৰ পেছিটান বিজেন্সীৰ নিৱাসী তাৰমানৰ পছন্দ হয় ২৪ বছৰীয়া শেলা আৰিকাক। তেওঁ শ্বেলাক বিয়াৰ প্ৰস্তাৱ দিয়ে।
৫০ বছৰৰ ডাঙৰ পাত্ৰৰ স’তে বিয়াত বহিবলৈ শ্বেলাৰ কোনো আপত্তি নাছিল। অৱশ্যে পাত্র-পাত্ৰীৰ বয়সৰ বিস্তৰ তাৰতম্যক লৈ শ্বেলাৰ পৰিয়ালে আপত্তি দর্শাইছিল। তথাপি তেওঁলোকে বিয়াত বাধা প্রদান কৰিব নোৱাৰিলে।
সংবাদ মাধ্যমে প্রকাশ কৰিছে যে তাৰমানে বিয়াৰ বিলাসবহুল আয়োজন কৰিছিল। বিয়াত উপস্থিত থকা প্রত্যেক অতিথিকে তেওঁ উপহাৰস্বৰূপে ভাৰতীয় মুদ্রাত ছহেজাৰকৈ টকা দিয়ে। প্রাথমিকভাবে জনোৱা হৈছিল যে পাত্ৰীৰ মূল্যস্বৰূপে তাৰমানে ভাৰতীয় মুদ্রাত ৬০ লাখ টকা দিব।
যদিও বিয়াৰ মণ্ডপত বহি তেওঁ সিদ্ধান্ত সলনি কৰে আৰু এক কোটি ৮০ লাখ টকা শ্বেলাৰ হাতত তুলি দিয়ে। তাকে দেখি এই বিৰাট অংকৰ চেকখন ভুৱা নেকিবুলি প্রশ্ন উত্থাপন কৰে পাত্ৰীৰ পৰিয়ালৰ লোকে। এনে পৰিস্থিতিত বিয়াৰ ফটো তোলাৰ দায়িত্বত থকা ফটোগ্ৰাফাৰসকলে দাবী কৰে যে তেওঁলোকৰ পাওনা আদায় নিদিয়াকৈ নৱ দম্পতীয়ে পলায়ন কৰিছে।
সেই অভিযোগৰ ভিত্তিত তদন্তও আৰম্ভ হৈছে। তাৰ মাজতে সামাজিক মাধ্যমত তাৰমানে দাবী কৰে যে নৱ পৰিণীতাক তেওঁ যি ধন দিছে, সেয়া একেবাৰে ভুৱা নহয়। বেংকত তেওঁৰ সেই পৰিমাণৰ ধন আছে। অৱশ্যে ফটোগ্ৰাফাৰ সকলৰ পাওনা আদায় দিয়াৰ প্ৰসংগত তেওঁ একো জনোৱা নাই।
উল্লেখ্য যে বিগত কিছু বছৰৰ পৰা ইণ্ডোনেছিয়াত পাত্র-পাত্রীৰ বয়সৰ পার্থক্য বহুখিনি হাস পাইছে। তেনে পৰিস্থিতিত এই ধৰণৰ বিয়াই সকলোকে আচৰিত কৰি তুলিছে।