Dispur Police:
বৰবাৰীৰ ভিআইপি ৰোডৰ প্ৰতীক্ষা হাস্পতালৰ সন্মুখৰ পৰা এজল লোকক অপহৰণ কৰি মুক্তপণ হিচাপে ২২ লাখ টকা দাবী কৰা আঠ অপহৰণকাৰী দিছপুৰ আৰক্ষীত জালত পৰে ৷ ধনদাবী আৰু অপহৰণত জড়িতৰ অভিযোগত গ্ৰেপ্তাৰ হৈছিল লাচিত সেনাৰ সদস্যকেইজন ৷
আনহাতে অপহৰণকাৰীৰ পৰা জব্দ কৰা হৈছিল বিকাশ অসমৰ স্বাক্ষৰ সম্বলিত ধনদাবী পত্র ৷ ধৃত আটাই কেইগৰাকী বীৰ লাচিত সেনাৰ সদস্য বুলি নিশ্চিত হোৱাৰ পিছতে বিকাশ অসমৰ সন্ধানত দিছপুৰ আৰক্ষীয়ে সোমবাৰে দুপৰীয়াৰ পৰা আৰম্ভ কৰিছে অভিযান ৷ দুটাকৈ ম’বাইল ফোন অফ কৰি পলাতক অৱস্থাত আছে বীৰ লাচিত সেনাৰ কামৰূপ মহানগৰ জিলা সমিতিৰ নেতা বিকাশ অসম ৷
এনে ঘটনাক্ৰমৰ মাজতে খ্ৰীষ্টিয়ানবস্তুীৰ এপল’ গ্ৰেণ্ড হোটেলৰ পৰা দিছপুৰ আৰক্ষীয়ে গ্ৰেপ্তাৰ কৰে বীৰ লাচিত সেনাৰ মুখ্য সচিব ৰন্টুপানী ফুকন ৷ সংবাদমেল সম্বোধন কৰি থকা সময়তে দিছপুৰ আৰক্ষী এটা দলে ৰন্টুপানী ফুকন সহ গ্ৰেপ্তাৰ কৰে মুখ্য তথ্য আৰু প্ৰচাৰ সচিব উৎপল দত্ত,তন্ময় চেতীয়াক ৷
উল্লেখ্য যে শেহতীয়াকৈ লাচিত সেনাৰ নামত ৰাজ্যৰ য’তে ত’তে ধন দাবী কৰা কেতবোৰ ঘটনা সংঘটিত হৈ অহাৰ ক্ষেত্ৰত মুখ্যমন্ত্ৰী :ড:হিমন্ত বিশ্ব শৰ্মাৰ আজি সংবাদ মাধ্যমৰ আগত দুপৰীয়া আগবঢ়াইছিল তাৎক্ষণিক প্ৰতিক্ৰিয়া ৷ এই সন্দৰ্ভত মুখ্যমন্ত্ৰীয়ে কয়,লাচিত সেনাৰ কাৰ্যকলাপক লৈ আমি গভীৰ অসন্তুষ্ট ,আৰু তেওঁলোকৰ কাৰ্যকলাপক লৈ আমি গভীৰ উদ্বেগ প্ৰকাশ কৰিছোঁ | আলফাৰ দৰে আমি এদিন হয়তো লাচিত সেনাক নিষিদ্ধ কৰিম।
ড:শৰ্মাই আৰু কয়,ব্যৱসায়ীকসকলক লাচিত সেনাই যথেষ্ট অত্যাচাৰ কৰে, অসমত ব্যৱসায়িক পৰিৱেশ এটা যোৱা দুমাহ একেবাৰে নষ্ট কৰি দিছে । লাচিত সেনাৰ এজনে অসমৰ আই মাতৃসকলক অপমান সূচক মন্তব্য কৰিছিল | আমি আৰক্ষীক কঠোৰ পদক্ষেপ ল’বলৈ নির্দেশ দিছোঁ I
