BiharElection:✒️’বিহাৰ হৈ বংগলৈ বৈ যোৱা গংগাই বিজয়ৰ পথ সৃষ্টি কৰিছে।’ বিহাৰ বিধানসভা নির্বাচনত এনডিএৰ বিশাল জয়ক লৈ এই মন্তব্য কৰে প্রধানমন্ত্রী নৰেন্দ্ৰ মোদীয়ে। শুকুৰবাৰে দলৰ নতুন দিল্লীস্থিত ৰাষ্ট্ৰীয় মুখ্য কার্যালয়ত বিজেপিয়ে বিজয় উৎসৱ উদযাপন কৰে।
এই উৎসৱত অংশ লৈ প্রধানমন্ত্রীয়ে উচ্ছাসিত সমর্থকসকলক উদ্দেশি দিয়া বক্তব্যত কয়, ‘বিহাৰ হৈ গংগা নৈ বৈ গৈছে। বিহাৰৰ বিজয়ে নৈখনৰ দৰে আমাৰ জয়ৰ পথ বংগলৈ মুকলি কৰিছে।’ এঘণ্টা ধৰি দিয়া ভাষণত মোদীয়ে লগতে কয় যে বিহাৰৰ নিৰ্বাচনত মহিলাসকল আৰু যুৱক-যুৱতীসকলে এনডিএৰ জয়ত মূল ভূমিকা পালন কৰে ‘MY (মহিলা আৰু যুৱক-যুৱতী)য়ে বিজয়ত মূল ভূমিকা পালন কৰিলে।’ তেওঁ এনেদৰে কয়।
অহা বছৰ বিধানসভা নির্বাচন অনুষ্ঠিত হ’ব লগা বিৰোধীশাসিত পশ্চিমবংগ, তামিলনাডু আৰু কেৰালাক ইংগিত কৰি মোদীয়ে লগতে কয়, ‘এই বিজয়ে কেৱল বংগতে নহয়, আমাৰ দক্ষিণৰ কর্মকর্তাসকলকো অনুপ্রাণিত কৰিব। বংগৰ জনতাক জংঘলৰাজ উৎখাত কৰিবলৈ মই আহ্বান জনালো।’
উচ্ছসিত দলীয় নেতা-কর্মীসকলৰ উল্লাস আৰু কৰধ্বনিৰ মাজতে মোদীয়ে কয়, ‘আপোনালোক (দলীয় কর্মকর্তা) ৰ আশা হৈছে মোৰ অংগীকাৰ আৰু আপোনালোকৰ সপোন হৈছে মোৰ অনুপ্ৰেৰণা। বিজেপিৰ বাবে দলীয় কর্মীসকলেই শক্তি।’
উচ্ছসিত দলীয় কর্মকর্তাসকলক গামোচা জোঁকাৰি অভিবাদনো জনায় মোদীয়ে। উল্লেখ কৰে যে অসমৰ গামোচাক মোদীয়ে সততে উচ্চ প্রশংসা কৰি আহিছে। আজি তেওঁ বিজয় উৎসৱতো গামোচা প্ৰদৰ্শন কৰা কাৰ্যই এক ইংগিতো বহন কৰিছে। কাৰণ অহা বছৰ অসমতো বিধানসভা নির্বাচন অনুষ্ঠিত হ’ব।