Nagaon:✒️অবিভক্ত নগাঁও জিলা অর্থাৎ বৰ্তমানৰ নগাঁও, হোজাই আৰু মৰিগাঁও জিলা মূলতঃ কৃষিপ্রধান হ’লেও শেহতীয়াভারে এই তিনি জিলাত উদ্বেগজনকভাবে হ্রাস পাইছে কৃষিভূমি আৰু কৃষকৰ সংখ্যা। জনবিস্ফোৰণৰ ফলত আৱাসিক অঞ্চল সম্প্ৰসাৰিত হৈছে।
ফলত পূৰ্বৰ কৃষিভূমিসমূহতে গঢ়ি উঠিছে আৱাসিক অঞ্চল। উল্লেখ্য যে অবিভক্ত নগাঁও জিলাৰ বৰ্তমানৰ জনসংখ্যা হৈছে প্রায় ৬০ লাখ।ইয়াৰে ৩০ লাখেই হৈছে নগাঁও জিলাৰ। ফলত সম্প্রতি জিলাখনৰ জনবসতিৰ ঘনত্ব প্রতি কিলোমিটাৰত ৭১১ জন হৈছে।
একেদৰে মৰিগাঁও জিলাত জনবসতিৰ ঘনত্ব ৫৬০ জন আৰু হোজাই জিলাত ৫৫০ জন হৈছে। অবিভক্ত নগাঁও জিলাত কৃষিভূমি দ্রুতহাৰত টুটি অহাৰ আন এক কাৰণৰূপে চিহ্নিত হৈছে শ শ হেক্টৰ ভূমিত গঢ়ি উঠা বিভিন্ন উদ্যোগ প্রতিষ্ঠান। এনে উদ্যোগ প্রতিষ্ঠানৰ অন্যতম হৈছে চিমেণ্ট কাৰখানা আৰু ইটাভাটা।
সম্প্রতি অবিভক্ত জিলাখনত কৃষিভূমিতে শতাধিক ইটাভাটা চলি আছে। একেদৰে কৃষিভূমিতে কে’বাটাও ইটাভাটা চলি আছে। তদুপৰি বিভিন্ন স্থানৰ কৃষি পথাৰত হোটেল, ধাবা, ৰেস্তোৰাঁ, পেট্র’ল পাম্পসহ অন্যান্য ব্যবসায়িক প্রতিষ্ঠান আছে। আনহাতে, জিলাখনৰ একাংশ কৃষকে অত্যধিক মাত্ৰাত ৰাসায়নিক সাৰ প্ৰয়োগ কৰাৰ ফলতো কৃষিভূমিৰ উৰ্বৰতা হ্রাস পাই অহা বুলি চৰ্চা হৈছে।
ইয়াৰ পৰিপ্ৰেক্ষিতত অবিভক্ত নগাঁও জিলাৰ নীলবাগান, ডবকা, হোজাই, ৰাঙলু, জুৰিয়া, ৰূপহী, ধিং, বটদ্রৱা, বেছামাৰী, ভোমোৰাগুৰি, ডুমডুমীয়া, আলিটাঙনি, ধণীয়াভেটি, টুকটুকী, দলংঘাট, লালি পথাৰ প্ৰমুখ্যে বিভিন্ন অঞ্চলৰ হেজাৰ হেজাৰ কৃষকে নিজৰ কৃষিভূমিত প্রকাণ্ড প্রকাণ্ড পুখুৰী খন্দাই মাছৰ খেতিহে কৰা পৰিলক্ষিত হৈছে।
ইয়াৰ ফলতো অবিভক্ত নগাঁও জিলাৰ কৃষি ভূমি হ্রাস পাইছে।ইপিনে, চাৰিশাৰীযুক্ত ৰাষ্ট্ৰীয় ঘাইপথ, চাৰিশাৰীযুক্ত বাইপাছ নির্মাণ, বিভিন্ন মথাউৰিৰ সুৰক্ষাৰ বাবে বিং বান্ধ, সুৰক্ষা মথাউৰি আদি নিৰ্মাণৰ ফলতো সংকুচিত হৈছে কৃষিভূমি। তদুপৰি ব্ৰহ্মপুত্ৰৰ প্ৰতিৰোধবিহীন গৰাখহনীয়াৰ কৱলত পৰিও জিলাখনৰ চামগুৰি, কলিয়াবৰ, ধিং, লাহৰীঘাট ৰাজহ চক্ৰৰ অন্তৰ্গত হেজাৰ হেজাৰ কৃষিভূমি লুইতত জাহ যোৱাৰ ফলতো জিলাখনত কৃষিভূমি সংকুচিত হৈছে।
একেদৰে নদীৰ কাষৰীয়া ঠাইৰ পথাৰত নদীয়ে বালি পেলোৱাৰ ফলতো সংকুচিত হৈছে কৃষিভূমি। উল্লেখ্য যে ১৯৯১-৯২ত অবিভক্ত নগাঁও জিলাত কৃষক আছিল ৪,০৩,৬৭৮ জন আৰু কৃষিভূমি আছিল ৩,৭১,৩৪৪ হেক্টৰ। শেহতীয়াভাবে জিলাখনৰ কৃষিভূমি ব্যাপক হাৰত হ্রাস পায়। ফলত সম্প্রতি চৰকাৰী তথ্য অনুসৰি মৰিগাঁও জিলাৰ মুঠ বমুঠ কৃষিভূমি হৈছে ১,২৪,৩৫২ হেক্টৰ আৰু নগাঁও জিলাৰ মুঠ কৃষিভূমি হৈছে ১,৫১,৭৪৪ হেক্টৰ।
অৱশ্যে বেচৰকাৰী তথ্য অনুসৰি জিলাখনত মুঠ কৃষক আৰু কৃষিভূমিৰ সংখ্যা বহু কম। একেদৰে তিনিটা দশকত কৃষকৰ সংখ্যাও অভাৱনীয়ভারে হ্রাস পায়। কাজেই পোহনীয়া গৰু-ম’হৰ সংখ্যাও হ্রাস পাইছে।
সূত্ৰৰ মতে, নগাঁও মহকুমাৰ অন্তৰ্গত নগাঁও সদৰ, ধিং, ৰূপহী, বহা আৰু চামগুৰিৰ ৰাজহ চক্ৰৰ অন্তৰ্গত অঞ্চলত বিভাগীয় অনুমতিত চলি থকা ৪৭ টা ইটাভাটাৰ ২২ টাই কৃষিভূমি ব্যৱহাৰ কৰি আছে। ইপিনে, বিগত ২০২২-২৩, ২০২৩-২৪ আৰু চলিত বর্ষত নগাঁও, হোজাই আৰু মৰিগাঁও জিলাত ১২শ বিঘাতকৈও অধিক কৃষিভূমিৰ শ্ৰেণী পৰিৱৰ্তন কৰা হৈছে।
এই বর্ষকেইটাত নগাঁও জিলাত ৬২৩ বিঘা চাৰি কঠা ছয় লেচা কৃষিভূমিৰ শ্ৰেণী পৰিৱৰ্তন কৰা হৈছে। একেদৰে মৰিগাঁও জিলাত ৪৯৫ বিঘা একঠা ১০ লেচা আৰু হোজাই জিলাত ৯০ বিঘা দুকঠা কৃষিভূমিৰ শ্ৰেণী পৰিৱৰ্তন কৰা হয়।