China:✒️বিগত কিছু বছৰত প্ৰযুক্তিৰ ক্ষেত্ৰত বহু উন্নয়ন সাধন কৰা চীনৰ সম্প্রতি আশংকাৰ কাৰণ হৈছে মানৱ সদৃশ ৰব’ট। ক্রমে দেশখনত এনে উদ্যোগত বিনিয়োগৰ পৰিমাণো চকুত লগা ধৰণে বৃদ্ধি পাইছে। ইয়াক লৈ সম্প্রতি উদ্বিগ্ন হৈছে চীনৰ কমিউনিষ্ট চৰকাৰ। এই উদ্বিগ্নতাৰ বহিঃপ্রকাশ ঘটাই চীন চৰকাৰে এক সতর্কবাণী প্রকাশ কৰিছে।
উল্লেখ্য যে চীন চৰকাৰে এনে সতর্কবাণী প্রকাশ কৰাটো এটা বিৰল ঘটনা। মানৱ সদৃশ ৰব’ট তৈয়াৰক লৈ আতংকিত হৈ চীনৰ ৰাষ্ট্ৰীয় উন্নয়ন আৰু সংস্কাৰ আয়োগে এই সতর্ক ভূমিকা পালন কৰিছে। উল্লেখ্য যে চীনত সম্প্রতি মানুহৰ নিচিনা বা হিউমেনয় ‘ড ৰব’ট তৈয়াৰ কৰা ডেৰ শতাধিক উদ্যোগ আছে। এই সমূহত বিপুল পৰিমাণৰ ধনৰ বিনিয়োগো ঘটিছে। ইয়ে শংকিত কৰি তুলিছে দেশখনৰ চৰকাৰক।
একেখন ক্ষেত্রতে সক্রিয় এই ডেৰ শতাধিক উদ্যোগৰ দ্বাৰা মানুহৰ নিচিনা ৰব’ট তৈয়াৰত নিষেধাজ্ঞা আৰোপৰো পোষকতা কৰিছে দেশখনৰ ৰাষ্ট্ৰীয় উন্নয়ন আৰু সংস্কাৰ আয়োগে। এই আয়োগৰ মুখপাত্র লাই চাওৱে সংবাদ মাধ্যমক কয়, ‘মানুহৰ নিচিনা ৰব’টে যাতে বজাৰ ভৰি নপৰে তাৰ বাবে ব্যৱস্থা গ্রহণ কৰাটো গুৰুত্বপূৰ্ণ হৈছে। ব্যাপক হাৰত এনে ৰব’ট তৈয়াৰে প্ৰকৃত গৱেষণা আৰু উন্নয়নমূলক পদক্ষেপসমূহক টেটু চেপি ধৰিব।’
এই ক্ষেত্রত চাওৱে লগতে আশংকা কৰে যে মানুহৰ নিচিনা ৰব’ট তৈয়াৰৰ যি টৌ উঠিছে সিয়ে আগশাৰীৰ উদ্যোগসমূহক বৃদ্ধি-বিকাশ বৰ্তাই ৰখাত প্ৰত্যাহ্বানৰ সম্মুখীন কৰাইছে। আনহাতে, চীন চৰকাৰে দেশখনৰ মানুহৰ নিচিনা ৰব’ট তৈয়াৰ উদ্যোগসমূহক লৈ উৎকণ্ঠিত হোৱাটোৱে দেশখনৰ মটৰ চাইকেল আৰু অৰ্ধ-পৰিবাহী প্রতিষ্ঠানসমূহক পংগু কৰিছে বুলিও চর্চা হৈছে।
উল্লেখ্য যে চলিত বৰ্ষৰ আৰম্ভণিতে চীনত এক ৰব’টৰ নৃত্য উৎসৱ উদ্যাপন কৰা হয়। এই উৎসৱৰ পাছতে দেশখনত মানুহৰ নিচিনা ৰবট তৈয়াৰৰ জোৱাৰ উঠে। কাৰণ উক্ত ৰব’টৰ নৃত্য উৎসৱ উদযাপনস্থলীত মানুহৰ নিচিনা ৰব’টে নৃত্য প্রদর্শন কৰি সমগ্ৰ দেশৰ জনতাক মন্ত্রমুগ্ধ কৰে। গতিকে মানুহৰ নিচিনা ৰব’ট তৈয়াৰ কৰিবলৈ বহু উদ্যোগ-প্রতিষ্ঠান আগবাঢ়ি আহে। লক্ষ্যণীয়ভাৱে চীনৰ কমিউনিষ্ট পার্টিয়েও পূর্বে ধাৰণা কৰিছিল যে আগন্তুক পাঁচ বছৰত দেশখনৰ বিকাশৰ অন্যতম মূল চালিকা শক্তিৰূপে ভূমিকা পালন কৰিব মানুহৰ নিচিনা ৰব’ট তৈয়াৰী উদ্যোগ প্রতিষ্ঠানসমূহে।
কমিউনিষ্ট পার্টিয়ে এনে ছটা খণ্ড বাছনি কৰিছে। ইয়াৰে অন্যতম হ’ল মানুহ সদৃশ ৰব’ট তৈয়াৰ খণ্ড। গতিকে এনে ৰব’ট তৈয়াৰী উদ্যোগ-প্ৰতিষ্ঠানৰ বিনিয়োগৰ জোৱাৰ উঠে। ফলত চলিত বর্ষত ‘ছ’লএক্টিভ হিউমেনয়’ড ৰব’টিক্স ইনডেক্স’ প্রায় ৩০ শতাংশ বৃদ্ধি পায়। এই ইনডেক্সে ৰব’ট তৈয়াৰী প্রতিষ্ঠানসমূহৰ শ্বেয়াৰক প্রতিনিধিত্ব কৰে।
চীনৰ ৰব’ট তৈয়াৰী প্রতিষ্ঠানসমূহৰ অগ্ৰণী প্রতিষ্ঠান হৈছে ইউবিটেক ৰব’টিক্স কৰ্প’ৰেচন। যোৱা শুকুৰবাৰে এই প্ৰতিষ্ঠানৰ শ্বেয়াৰৰ মূল্য চাৰি শতাংশ বৃদ্ধি পায়। গতিকে চিটি গ্রুপ ইংকে পূর্বানুমান কৰিছে যে চীনৰ ৰব’ট তৈয়াৰী খণ্ডৰ বজাৰ ২০৫০ৰ ভিতৰত সাত লাখ কোটি ডলাৰলৈ বৃদ্ধিৰ সম্ভাৱনা আছে।
গতিকে এই খণ্ডত বিনিয়োগ প্ৰচুৰ হ’বলৈ ধৰিছে। ইয়ে মূৰকত চীনৰ চৰকাৰকে শংকিত কৰি তুলিছে। আনহাতে, এক তথ্য অনুসৰি ২০২৩ত চীনে দুই লাখ ৯০ হেজাৰৰো অধিক ঔদ্যোগিক ৰব’ট নিয়োজিত কৰে। ইয়াৰ বিপৰীতে সমগ্র বিশ্বত যিমান ঔদ্যোগিক ৰব’ট আছে সেই সকলো একেলগ কৰিলেও চীনৰ ঔদ্যোগিক ৰব’টৰ সংখ্যাৰ সমান নহয়।
দেখা যায় যে চীনত প্রতি ১০ হেজাৰ কৰ্মচাৰীৰ বিপৰীতে ৪৭০ টা ৰব’ট আছে। অৰ্থাৎ মানুহৰ দৰে ৰব’টে দেশখনত কাম কৰিবলৈ লৈছে। গতিকে দেশখনত মানুহৰ নিচিনা ৰব’ট তৈয়াৰ অব্যাহত আছে। গতিয়ে ইয়ে অদূৰ ভবিষ্যতে বিপদ অনাৰ আশংকা কৰিছে বেইজিঙে।