Cow Theft Incident In Dibrugarh:
বছৰটোৰ দ্বিতীয়টো দিনতেই ডিব্ৰুগড়ৰ মাইজান নতুন গাঁৱত আৰক্ষীৰ শূন্যলৈ গুলীচালনা I গৰু চোৰক কেন্দ্র কৰি ডিব্ৰুগড়ত উতপ্ত পৰিস্থিতি । স্থানীয় ৰাইজৰ মতে ৰাইজে আটক কৰা গৰু চোৰক আৰক্ষীয়ে যাবলৈ দিয়াৰ অভিযোগৰ পিছতে উদ্ভৱ হয় অপ্ৰীতিকৰ পৰিস্থিতি। বিগত বহু সময় ধৰি মাইজানৰ স্থানীয় ঘৰৰ পৰা চুৰি হৈছিল গৰু-ছাগলী। সেয়ে সেই অঞ্চলৰ একাংশ যুৱকে পহৰা দিয়াৰ ব্যৱস্থা কৰিছিল। আজিও পহৰা দি থাকোঁতেই পুৱতি নিশা প্ৰায় ৩ বজাত মাইজানৰ নতুন গাঁৱত এখন নাম্বাৰ প্লেট বিহীন চাৰিচকীয়া বাহন লৈ তিনি জন যুৱকৰ দল ৰহস্যজনক ভাৱে প্ৰৱেশ কৰে।
ৰহস্যজনক ভাৱে প্ৰৱেশৰ পাছতে গৰুৰ জাক এটাৰ কাষলৈ যোৱাত গাওঁখনত গৰু চোৰ কৰিবলৈ অহাৰ সন্দেহত যুৱক কেইজনক সোধা পোচা কৰি আটক কৰি ৰাখে। কিন্তু যুৱকৰ দলটোৱে স্থানীয় ৰাইজৰ প্ৰশ্নৰ সদুত্তৰ দিব নিদি গোপনে আৰক্ষীলৈ ফোন কৰে। লগে লগে টহলদাৰী আৰক্ষীৰ দল উপস্থিত হৈ স্থানীয় ৰাইজক আশ্বস্ত কৰাৰ বিপৰীতে নম্বৰ প্লেট বিহীন বাহন সহ তিনি যুৱকক আঁতৰাই পঠাই। তাৰ পাছতেই স্থানীয় ৰাইজ ক্ষোভিত হৈ পৰে। দীৰ্ঘদিন ধৰি অঞ্চলটোত গৰু তথা পশুধনৰ চুৰি কাৰ্যৰ ফলত অতিষ্ঠ হৈ আছিল স্থানীয় ৰাইজ।
ইতিমধ্যে অঞ্চলটোত গৰু চুৰি সংঘটিত হৈ গোহালীৰ খালী হৈ পৰাৰ অভিযোগ উত্থাপন হোৱা লগতে গৰু চুৰ ৰোধ কৰিবলৈ যোৱাৰ সময়ত গৰু চুৰিৰ হাতত কেইবাজনো লোক প্ৰহৃত হ’ব লগা হৈছে। অৱশেষত স্থানীয় গাওঁবাসীয়ে পাল পাতি গৰু চুৰ ৰুধিবলৈ চেষ্টা কৰি আহিছিল। তেনে সময়তে যোৱা নিশা প্ৰায় ৩ বজাত নম্বৰ প্লেট বিহীন বাহনত সন্দেহ জনক ভাৱে তিনি যুৱকক স্থানীয় ৰাইজে ৰখাই সোধপোছ কৰাৰ পৰৱৰ্তী সময়ত যি উতপ্ত পৰিস্থিতিৰ সৃষ্টি হয়। স্থানীয় ৰাইজ আৰু আৰক্ষীৰ মাজত মতানৈক্যৰ সৃষ্টি হয়। ঠেলা হেঁচাৰ লগতে পৰিস্থিতি নিয়ন্ত্রণৰ বাহিৰলৈ যায়। অভিযোগ অনুসৰি এজন আৰক্ষী কনিষ্টবল আহত হয়। অৱশেষত আৰক্ষীৰ লোকে শূন্যলৈ গুলী চালনা কৰে ।
পৰিস্থিতি অধিক অৱনতি ঘটাত নিয়ন্ত্ৰণৰ বাবে আহিব লগা হ’ল অতিৰিক্ত আৰক্ষী পৰ্যন্ত । টনা- আজোৰাত এজন আৰক্ষীৰ লোকৰ নেইম প্লেট ঘটনাস্থলিতে পৰি ৰয়।ৰাইজে খালি কাৰ্টজ উদ্ধাৰ কৰি আৰক্ষীক গটাই দিয়া বুলিও প্ৰকাশ কৰিছে। ইফালে ঘটনাক লৈ ডিব্ৰুগড় আৰক্ষী অধীক্ষক দিলীপ অভিজিৎ গৌৰৱ উপস্থিত হৈ পৰিস্থিতি তদন্ত কৰে।
ঘটনাস্থলীত জ্যেষ্ঠ আৰক্ষী অধীক্ষক ,অতিৰিক্ত আৰক্ষী অধীক্ষক,উপ আৰক্ষী অধীক্ষক সহ বিশাল অৰ্ধসামৰিক বাহিনী উপস্থিত হৈ কেনেদৰে ঘটনাটো সংঘটিত হ’ল সেই সন্দৰ্ভত তদন্ত অব্যাহত ৰখাৰ লগতে নম্বৰ প্লেট বিহীন বাহন খন আৰক্ষীয়ে জব্দ কৰে। লগতে বাহনখনত থকা গৰু চুৰৰ সন্দেহ কৰা তিনি যুৱকক আটক কৰি তদন্ত অব্যাহত ৰাখিছে। আৰক্ষীয়ে জানিবলৈ দিয়া মতে তিনি যুৱকে পুৱতি নিশা উক্ত অঞ্চললৈ যোৱা সময়ত স্থানীয় ৰাইজে আইন হাতত তুলি বাহন অনিষ্ট আৰু তিনি যুৱকক প্ৰহাৰ কৰাৰ বাবে পৰিস্থিতি নিয়ন্ত্ৰণ কৰিবলৈ গুলী চলাব লগা পৰিস্থিতিৰ সৃষ্টি হয়।
