যুদ্ধবিধ্বস্ত গাজা ষ্ট্ৰীপত স্থিৰতা ঘূৰাই আনিবলৈ গঠিত হ’বলগীয়া আন্তঃৰাষ্ট্ৰীয় সুৰক্ষা বাহিনীত পাঁচখন দেশে সৈন্য প্ৰেৰণৰ দৃঢ় সংকল্প জনাইছে। “Board of Peace”ৰ প্ৰথম বৈঠকৰ পিছতেই এই গুৰুত্বপূৰ্ণ সিদ্ধান্ত ঘোষণা কৰা হয়।
উল্লেখযোগ্য যে, ইন্দোনেচিয়া, মৰক্কো, কাজাখস্তান, কছোভো আৰু আলবেনিয়াই নতুনকৈ গঠিত International Stabilization Force (ISF)-ত নিজৰ সেনা প্ৰেৰণ কৰিবলৈ সন্মতি প্ৰকাশ কৰিছে।
ইয়াৰ উপৰি মিশৰ আৰু জৰ্ডনে গাজাত আৰক্ষী প্ৰশিক্ষণ আৰু আইন-শৃংখলা ব্যৱস্থা পুনৰ গঠনত সহায় কৰাৰ আশ্বাস দিছে।
সূত্ৰ অনুসৰি, বাহিনীৰ প্ৰাথমিক মোতায়েন আৰম্ভ হ’ব দক্ষিণ গাজাৰ ৰাফা অঞ্চলৰ পৰা। পৰ্যায়ক্রমে অন্য সংবেদনশীল এলেকালৈ সুৰক্ষা ব্যৱস্থা বিস্তাৰ কৰা হ’ব।
এই বাহিনীৰ মূল লক্ষ্য হৈছে সংঘাত-পৰৱৰ্তী সময়ত সাধাৰণ নাগৰিকৰ সুৰক্ষা নিশ্চিত কৰা, সাহায্য বিতৰণ সুসংগঠিত কৰা আৰু পুনৰ্নিমাণ প্ৰক্ৰিয়া সুৰক্ষিত কৰি তোলা।
প্ৰস্তাৱিত পৰিকল্পনা অনুসৰি, পূৰ্ণাংগ বাহিনী গঠন হ’লে প্ৰায় ২০ হেজাৰ সৈন্য আৰু ১২ হেজাৰ আৰক্ষী কৰ্মী নিয়োজিত থাকিব। যদিও এই পদক্ষেপক লৈ আন্তঃৰাষ্ট্ৰীয় মহলত আলোচনা চলি আছে, তথাপি গাজাত স্থায়ী শান্তি স্থাপনৰ দিশত ইয়াক এক গুৰুত্বপূৰ্ণ অগ্ৰগতি বুলি বিবেচনা কৰা হৈছে।
বিশ্ব ৰাজনীতিত নতুন সমীকৰণৰ মাজতে গাজাত এই আন্তঃৰাষ্ট্ৰীয় উপস্থিতিয়ে পৰৱৰ্তী সময়ত কি প্ৰভাৱ পেলায়, সেয়া লক্ষ্যণীয় হৈ উঠিছে।