প্রধানমন্ত্রী নৰেন্দ্র মোদীৰ শাসনত ভাৰতত অতি চহকীহে অধিক চহকী হৈছে বুলি চলি থকা চর্চা সম্প্রতি সত্য প্রমাণিত হৈছে। আনকি মাথোঁ এবছৰতে দেশত বৃদ্ধি পালে ৫৭ জন অর্বুদপতিৰ সংখ্যা। ফলত সম্প্রতি দেশৰ অর্বুদপতিৰ সংখ্যা ৩০৮ জন হৈছে।
এই তথ্য প্রকাশ পাইছে ২০২৬ৰ হুকন প্ল’ৱেল বিচ্চ তালিকাত। উক্ত তালিকাৰ মতে, অর্বুদপতি বা বিলিয়নাৰৰ দিশৰ পৰা ভাৰতৰ স্থান আমেৰিকা যুক্তৰাষ্ট্ৰ আৰু চীনৰ পাছতে আছে; অর্থাৎ অতি চহকীৰ দিশৰ পৰা সম্প্রতি ভাৰতৰ স্থান বিশ্বত তৃতীয় হৈছে।
উক্ত তালিকাৰ মতে, বছৰটোত ভাৰতত নতুনকৈ ৫৭ জনৰ নাম অর্বুদপতিৰ তালিকাত সংযোজিত হয়। অৱশ্যে বছৰটোত আন ২৭জনে তালিকাখনৰ পৰা স্থান হেৰুৱায়। আনহাতে, বছৰটোত ভাৰতীয় অর্বুদপতিসকলৰ সম্পত্তি ১০ শতাংশ বৃদ্ধি পাই ১১২.৬ লাখ কোটি টকা হয়। এই তিনি শতাধিক ভাৰতীয় অর্বুদপতিৰ মাজৰ ১৯৯ জনৰ সম্পদ চকুত লগাকৈ বৃদ্ধি পায়।
আনহাতে, ১০৯ জনৰ সম্পত্তি হ্রাস পায় বা সম্পত্তিৰ মূল্য অপৰিৱৰ্তিত থাকে। উল্লেখ্য যে ভাৰতীয় অর্বুদপতিসকলৰ সাত শতাংশ হৈছে মহিলা। উক্ত তালিকাত এই কথা উল্লেখ কৰা হৈছে যে বহু ভাৰতীয় অর্বুদপতিয়ে ব্যৱসায়-বাণিজ্য পৰম্পৰাগত খণ্ডসমূহৰ পৰা ন ন ক্ষেত্ৰলৈ সম্প্ৰসাৰিত কৰিছে।
আনহাতে, ৰিলায়েন্স ইণ্ডাস্ট্রিজৰ অধ্যক্ষ মুকেশ আম্বানী ভাৰত তথা এছিয়াৰে সবাতোকৈ ধনী ব্যক্তিৰ স্থান অক্ষুণ্ণ ৰাখিছে। সম্প্রতি আম্বানীৰ সম্পত্তিৰ মূল্য ৯.৮৯ লাখ কোটি টকা। যোৱা বছৰতকৈ এইবাৰ তেওঁৰ সম্পদ ন শতাংশ বৃদ্ধি পায়। উক্ত তালিকাত লগতে কোৱা হৈছে যে দেশত সম্পদৰ দিশৰ পৰা শক্তি খণ্ডই সবাতোকৈ অধিক আধিপত্য বিস্তাৰ কৰিছে।
অৱশ্যে শক্তি খণ্ডৰ ব্যৱসায়ৰ স’তে আঠজন অর্বুদপতিহে জড়িত আছে। তৎসত্ত্বেও এই আঠ অর্বুদপতিয়ে দেশৰ মুঠ অর্বুদপতিৰ সম্পদৰ মূল্যৰ প্ৰায় ১৬ শতাংশই দখল কৰি আছে। উল্লেখ্য যে বছৰটো পুনেস্থিত ছিৰাম ইনষ্টিটিউট অৱ ইণ্ডিয়াৰ প্ৰতিষ্ঠাপক তথা অধ্যক্ষ চাইৰাছ এছ পুনাৱালাই বছৰটোত সম্পদ আহৰণৰ ক্ষেত্ৰত ভাৰতীয় অর্বুদপতিসকলৰ ওপৰত আধিপত্য সাব্যস্ত কৰে। বছৰটোত তেওঁ ০.৯১ লাখ কোটি টকাৰ সম্পদ আহৰণ কৰে।
আনহাতে, দেশৰ বাণিজ্যিক ৰাজধানী মুম্বাইয়ে এইবাৰো অর্বুদপতিৰ দিশৰ পৰা দেশত আধিপত্য অক্ষুণ্ণ ৰাখে। মায়ানগৰীত বর্তমানেও সর্বাধিক অর্বুদপতিয়ে বাস কৰি আছে। মুম্বাইত মুঠ ৯৫ জন অর্বুদপতিয়ে বাস কৰি আছে। অৱশ্যে এছিয়াৰ ভিতৰত সৰ্বাধিক অর্বুদপতিয়ে বাস কৰে চীনৰ শেনজেন চহৰত। শেনজেনত ১৩৩ জন অর্বুদপতিয়ে বাস কৰি আছে। আনহাতে, বিশ্বৰ ভিতৰত সৰ্বাধিক সংখ্যক অর্বুদপতিয়ে বাস কৰা চহৰ হৈছে আমেৰিকা যুক্তৰাষ্ট্ৰৰ নিউয়র্ক।
মহানগৰখনত বাস কৰা মুঠ অর্বুদপতিৰ সংখ্যা হৈছে ১৪৬ জন। অয়’ৰ প্ৰতিষ্ঠাপক ৰিতেশ আগৰৱাল ভাৰতৰ সৰ্বকনিষ্ঠ অর্বুদপতি হুৰুন গ্ল’বেল বিচ তালিকাৰ মতে ভাৰতৰ সৰ্বকনিষ্ঠ অর্বুদপতিজন হ’ল অয়’ৰ প্ৰতিষ্ঠাপক বিতেশ আগৰৱাল। এইজন অর্বুদপতিৰ বয়স সম্প্রতি ৩২ বছৰ। তেওঁৰ সম্পদৰ মুঠ মূল্য হৈছে ১৪,৪৪০ কোটি টকা।
আনহাতে, দেশৰ অর্বুদপতিসকলৰ গড় বয়স হৈছে ৬৭ বছৰ। ইয়াৰ বিপৰীতে বিশ্বৰ অর্বুদপতিসকলৰ গড় বয়স হৈছে ৬৫ বছৰ। এইবাৰৰ উক্ত তালিকা অনুসৰি, দেশৰ মুঠ ২৩ মহিলা অর্বুদপতিৰ মুঠ সম্পদৰ মূল্য হৈছে ৯.৮ লাখ কোটি টকা। এনেদৰে মহিলা অর্বুদপতিৰ সংখ্যা বৃদ্ধিয়ে দেশৰ সম্পদৰ ভূচিত্ৰাৱলীত মহিলা উদ্যমীৰ সংখ্যা বৃদ্ধিক ইংগিত কৰিছে। দেশত উদ্যমিতা বৃদ্ধি পাবলৈ ধৰিছে বুলিও উক্ত তালিকাত কোৱা হৈছে।