Allegations of fraud:
আসন্ন ৰাজ্যৰ বিধানসভা নিৰ্বাচনৰ বাবে বিজেপিৰে অগপৰ আসন বুজাপৰা অব্যাহত থকাৰ মাজতে নৱগঠিত ডিমৰীয়া বিধানসভা সমষ্টি অনুসূচিত জাতিৰ বাবে সংৰক্ষিত হোৱাৰ সুযোগ লৈ জাতিগত ভুৱা নথিৰে প্ৰাৰ্থী হ’বলৈ উঠিপৰি লাগিছে কে’বাজনো অগপ – বিজেপি নেতাই ৷
ইয়াৰ ভিতৰত অসম গণ পৰিষদৰ জ্যেষ্ঠ নেতা ড:তপন দাস অন্যতম বুলি চর্চিত হৈছে। অভিযোগ অনুসৰি দলটোৰ অন্যতম সাধাৰণ সম্পাদক তথা অসম পণ্যাগাৰ নিগমৰ উপাধ্যক্ষ ড:দাস প্রকৃততে অন্যান্য পিছপৰা শ্রেণী (অ’বিচি) সম্প্রদায়ৰ লোক। কিন্তু পৰৱৰ্তী সময়ত তেওঁ নিজকে অনুসূচিত জাতিৰ লোক বুলি প্ৰক্ষেপ কৰে। শপতনামাৰ জৰিয়তে অ’বিচিৰ পৰা তেওঁ হৈ পৰে অনুসূচিত জাতিৰ লোক।
অথচ চৰকাৰী নথিপত্ৰতে তেওঁ যে অ’বিচি সম্প্ৰদায়ৰ সেয়া স্পষ্টভারে উল্লেখ আছে। তপন দাস পূর্বে তপন ডেকা আছিল। ১৯৮৭ ত তেওঁ নিউ গুৱাহাটী আদর্শ হাইস্কুলত তপন ডেকা নামৰে নামভৰ্তি কৰিছিল। তেওঁৰ পিতৃজন হ’ল নাৰায়ণ চন্দ্র দাস। পঞ্চম শ্ৰেণীত পঢ়ি থকাৰ সময়তে ১৯৯০ত তেওঁ উপাধি সলনি কৰি ডেকাৰ ঠাইত দাস লিখিবলৈ আৰম্ভ কৰে।
লক্ষ্যণীয় যে তেওঁ ১৯৯৪ত হাইস্কুল শিক্ষান্ত পৰীক্ষাত অৱতীর্ণ হৈছিল আৰু সেই সময়ত তেওঁ নিজকে সাধাৰণ শ্ৰেণীৰ লোক বুলি নথিত উল্লেখ কৰিছিল। অভিযোগ অনুসৰি তেওঁ প্ৰকৃততে ‘কেওট’ সম্প্ৰদায়ৰ লোক। তেওঁৰ পৰিয়ালৰ ভূমিৰ নথিত পিতৃৰ নাম নাৰায়ণ চন্দ্র ডেকা আৰু ককাক তথা পিতৃৰ পিতৃৰ নাম বলিৰাম কেওট বুলি উল্লেখ আছে।
কেওট সম্প্ৰদায়ৰ লগত কৈৱৰ্ত সম্প্ৰদায়ৰ কোনো সম্পর্ক নাই। কেওটসকল অ’বিচি সম্প্রদায়ৰ অন্তর্ভুক্ত। তেনে ক্ষেত্ৰত তপন দাসৰ তথ্য জালিয়াতি কৰি অগপৰ মজিয়াতে তীব্র প্রতিক্রিয়াৰ সৃষ্টি হৈছে। অৱশ্যে দলটোৰ নিৰ্দিষ্ট কেইজনমান জ্যেষ্ঠ নেতাই বিষয়টো গাপ দিবলৈ চেষ্টা অব্যাহত ৰাখিছে। বিষয়টোক লৈ প্রতিক্রিয়া প্রকাশ কৰিছে অনুসূচিত জাতি সংগ্রামী যুৱ পৰিষদে।
সংগঠনটোৰ সভাপতি সঞ্জীৱ দাসে এই সন্দৰ্ভত কয়, ‘কেৱল ৰাজনৈতিক মুনাফা আদায়ৰ স্বাৰ্থত নিশাৰ ভিতৰতে তপন ডেকা হৈ পৰিল তপন দাস। এই কুকর্ম সংঘটিত কৰা নেতাজনক শীঘ্ৰে গ্ৰেপ্তাৰ কৰিব লাগে। এনে ধৰণৰ লোকেই প্রকৃত অনুসূচিত জাতিৰ লোকৰ পেটত গোৰ মাৰি প্ৰাপ্য অধিকাৰৰ পৰা বঞ্চিত কৰিছে। তপন দাস প্রকৃততে কেওট সম্প্রদায়ৰ লোক আৰু সেয়া তথ্যগতভাবে প্রমাণিত। কেওট সম্প্ৰদায়ৰ পৰা কেনেকৈ হঠাতে অনুসূচিত জাতিৰ লোক হৈ পৰিল সেয়া গভীৰ উদ্বেগৰ বিষয়।’ কেৱল মন্ত্রীৰ ঘনিষ্ঠ হোৱা বাবেই এই ধৰণৰ ভয়ংকৰ জালিয়াতি কৰিও ‘তপন ডেকা’ৰ দৰে লোকসকল সাৰি যাব নেকি বুলি সংগঠনটোৱে প্রশ্ন উত্থাপন কৰিছে।