Cylinder Crisis:✒️পশ্চিম এছিয়াৰ কে’বাখনো ৰাষ্ট্ৰত অব্যাহত থকা যুদ্ধৰ পৰিণামস্বৰূপে ভাৰতৰ তেল আৰু গেছৰ বজাৰত উদ্বেগজনক প্ৰভাৱ পৰিছে। বিশেষকৈ ৰন্ধন গেছৰ নাটনিয়ে সমগ্ৰ দেশৰ বজাৰ ব্যৱস্থাৰ ওপৰত মাধমাৰ শোধাইছে।
বাণিজ্যিক ৰন্ধন গেছৰ উৎপাদন বন্ধ কৰি দিয়াত হাহাকাৰ লাগিছে হোটেল-ৰেষ্টুৰেণ্ট খণ্ডত।গেছৰ অভাৱত বন্ধ হৈ পৰিছে হোটেল-ৰেষ্টুৰেণ্টৰ পাকঘৰৰ চৌকা। বজাৰৰ এই পৰিৱেশৰ প্ৰভাৱ পৰিছে সাধাৰণ মানুহৰ ঘৰৰ পাকঘৰতো।
ঘৰুৱা ৰন্ধন গেছৰ চিলিণ্ডাৰৰ নাটনি হোৱা নাই বুলি কেন্দ্রীয় চৰকাৰৰ পৰা ৰাজ্য চৰকাৰলৈকে আৰম্ভ কৰি সকলোৱে দাবী কৰিলেও তাৰ বাস্তৱ ৰূপ সম্পূর্ণ বিপৰীত।
চিলিণ্ডাৰ বুকিঙৰ এটা গ্ৰহণ কৰাৰ পাছত দ্বিতীয়টোৰ বাবে গ্রাহকে ২৫ দিন অপেক্ষা কৰাটো বাধ্যতামূলক কৰা হৈছে। কিন্তু যিসকলৰ ইতিমধ্যে ২৫ দিন হৈছে তেওঁলোকেও ‘বুক’ কৰিব পৰা নাই।
অনলাইন ব্যৱস্থাৰেই গ্রাহকে চিলিণ্ডাৰ বুক কৰি আহিছে যদিও যোৱা দুদিনৰ পৰা এই ব্যৱস্থা সম্পূর্ণভাৱে বন্ধ হৈ আছে। এই সন্দর্ভত কোনো তথ্য সংশ্লিষ্ট তৈল প্রতিষ্ঠানবোৰে সদৰী কৰা নাই।
এজেন্সীবোৰেও এই ক্ষেত্ৰত গ্ৰহণ কৰিছে সম্পূর্ণ অজ্ঞতা। এজেন্সীবোৰৰ এই ক্ষেত্ৰত এটাই উত্তৰ গ্ৰাহকক দি আহিছে আৰু সেয়া হ’ল- ‘চাৰ্ভাৰ ডাউন, আমি একো নাজানো।’
যি সময়ত মুখ্যমন্ত্রীয়ে অসমত ঘৰুৱা ৰন্ধন গেছৰ চিলিণ্ডাৰৰ নাটনি নাকচ কৰি আহিছে, তাৰ বিপৰীত পৰিস্থিতিৰ সন্মুখীন হৈছে সাধাৰণ গ্রাহক। গতিকে চৰকাৰৰ বক্তব্য যে বিভ্রান্তিকৰ আৰু কোনো জৰুৰী বিষয় গোপন কৰাৰ চেষ্টা যে চৰকাৰে চলাইছে সেয়া স্পষ্ট হৈছে।
এজেন্সীৰ গুদামৰ সন্মুখত খালী চিলিণ্ডাৰ লৈ ঘণ্টাৰ পাছত ঘণ্টা থিয় হৈ থকা গ্রাহকৰ দীঘলীয়া শাৰীও এতিয়া সুলভ হৈছে। ইপিনে, কালি সকলো ৰাজ্যৰ মুখ্য সচিব, আৰক্ষী সঞ্চালক প্রধান, গৃহ আৰু ৰাজনৈতিক বিভাগ, গ্রাহক পৰিক্ৰমা বিভাগ, তথ্য আৰু সম্প্ৰচাৰ আদি বিভাগৰ শীৰ্ষ বিষয়াসকলক লৈ কেন্দ্ৰীয় চৰকাৰৰ এখন জৰুৰী বৈঠক অনুষ্ঠিত হয়।
ভিডিঅ’ কনফাৰেন্সিঙৰ জৰিয়তে অনুষ্ঠিত সকলো ৰাজ্যৰ পৰিস্থিতিৰ বুজ লয় কেন্দ্রীয় চৰকাৰে।এই বৈঠকৰ পাছতে দিছপুৰত মুখ্য সচিব ড° ৰবি কোটাৰ অধ্যক্ষতাত অসমৰ পৰিস্থিতিক লৈ এখন পর্যালোচনা বৈঠক অনুষ্ঠিত হয়। ইয়াত তেল আৰু গেছ যোগান ধৰা তৈল প্রতিষ্ঠানবোৰৰ প্ৰতিনিধি উপস্থিত থাকে। বৈঠকত মত পোষণ কৰা হয় যে অসমত তাৎক্ষণিকভাৱে ৰন্ধন গেছৰ চিলিণ্ডাৰৰ কোনো নাটনি হোৱা নাই।
বিশেষকৈ ঘৰুৱা ৰন্ধন গেছৰ চাহিদা পূৰণ কৰিব পৰাকৈ গেছৰ যোগান অব্যাহত আছে। এনে ক্ষেত্ৰত ৰন্ধন গেছৰ নাটনি হোৱা বুলি উৰা বাতৰি প্ৰচাৰ নকৰিবলৈ সকলোকে এই বৈঠকৰ পৰা আহ্বান জনোৱা হয়। তেনে উৰা বাতৰিৰ ওপৰত চকু ৰাখিবলৈ এখন সমিতি গঠনৰো সিদ্ধান্ত লোৱা হয়। ইয়াৰ সমান্তৰালকৈ অবৈধ মজুতকৰণ, ক’লা বজাৰ, উচ্চ মূল্য আদায় আদিৰ ওপৰতো এই সমিতিয়ে চকু ৰাখিব। তেনে কাৰ্যত লিপ্তৰ বিৰুদ্ধে কঠোৰ আইনী ব্যৱস্থা গ্রহণৰো সভাই সিদ্ধান্ত গ্রহণ কৰে।