এতিয়া আৰু ছিমৰনৰ দিন নাই।’ সম্প্রতি নিজৰ এখন স্মৰণীয় ছবিৰ প্রসংগত এই মন্তব্য কৰিছে বলিউদৰ অভিনেত্রী কাজলে। নতুন প্ৰজন্মৰ স’তে তুলনা কৰিবলৈ গৈ অভিনেত্ৰীগৰাকীয়ে তেওঁৰ বহুচৰ্চিত ছবি ‘দিলবালে দোলহোনীয়া লে জায়েংগে’ৰ প্রসংগ উত্থাপন কৰি কাজলে মন্তব্য কৰিছে যে জেন জিয়ে অভিভাৱকৰ পৰা কোনো অনুমতি নলয়।
নিজৰ মনৰ কথা খুলি ক’বলৈ কোনো ধৰণৰ দ্বিধাবোধ নকৰা অভিনেত্ৰীগৰাকীয়ে সম্প্রতি এক সাক্ষাৎকাৰত ১৯৯০ৰ তুলনাত সম্পর্ক আৰু জীৱনশৈলী কিমান সলনি হৈছে, সেয়া বুজাবলৈকে ‘দিলবালে দোলহোনীয়া লে জায়েংগে’ত নিজৰ চৰিত্ৰটোৰ প্রসংগ টানি আনে।
একে সময়তে তেওঁ ৩১ বছৰ সম্পূৰ্ণ কৰা বলিউদৰ সৰ্বকালৰ অন্যতম জনপ্রিয় ছবিখনৰ স্মৃতিও ৰোমন্থন কৰে।
উল্লেখ্য যে চিত্রগৃহত মাহ মাহ ধৰি চলা ছবিখনৰ মূল অভিনেতা-অভিনেত্রী আছিল শ্বাহৰুখ খান আৰু কাজল। কাহিনী অনুসৰি, ইউৰোপত ফুৰিবলৈ গৈ কাজলে অভিনয় কৰা ছিমৰনৰ চৰিত্ৰটোৱে ঘটনাক্রমে শ্বাহৰুখৰ চৰিত্ৰটোক লগ পায়। হাঁহি-ধেমালিৰ মাজেৰেই তেওঁলোকৰ মাজত প্ৰেমৰ সম্পৰ্ক গঢ়ি উঠে।
ইউৰোপত লগৰীয়াৰ স’তে ফুৰিবলৈ যোৱাৰ বাবে ছিমৰনে অত্যন্ত কঠোৰ পিতৃৰ পৰা অনুমতি ল’বলগীয়া হৈছিল। এক সাক্ষাৎকাৰত কাজলে নতুন প্ৰজন্মৰ মানসিকতাৰ কথা ক’বলৈ গৈ ছিমৰনে পিতৃৰ পৰা অনুমতি লোৱাৰ বিষয়টো উত্থাপন কৰে। কাজলে কয় যে সময় বাগৰাৰ লগে লগে আজিৰ প্ৰজন্মৰ মানসিকতাতো ব্যাপক পৰিৱৰ্তন ঘটিছে।
তেওঁ কয়, ‘মই নাভাবো যে আজিৰ দিনত কোনো ১৮ বা ১৯ বছৰীয়া তৰুণীয়ে ক’ৰবালৈ যোৱাৰ পূৰ্বে নিজৰ পিতৃক ক’ব, ‘অনুগ্রহ কৰি মোক এই ভ্রমণত যাবলৈ অনুমতি দিবনে?’
তাতকৈ এনেদৰে ক’ব, ‘দেউতা, মই নিশ্চিতভাবে এই স্কুলীয়া ভ্রমণত যাম আৰু তাৰ কাৰণে তুমি খৰচ বহন কৰিব লাগিব।’ গতিকে এয়া অনুমতি বিচৰাতকৈ বহু বেছি।’
নৱ প্ৰজন্মৰ মানসিকতালৈ পৰিৱৰ্তন অহা বুলি মানি ল’লেও কাজলে অৱশ্যে কয় যে ‘দিলৱালে দোলহোনীয়া লে জায়েংগে’ত দিয়া মূল বার্তাত আজিও যুক্তিযুক্ততা আছে।