একেখন মঞ্চতে উপবিষ্ট হ’ল একালৰ ঘোৰ শত্ৰু মূলায়ম-মায়াৱতী

লোকসভা নিৰ্ব্বাচনৰ প্ৰচাৰ তুংগত উঠাৰ সময়তে একেখন মঞ্চত উপবিষ্ট হ’ল একালৰ ঘোৰ শত্ৰু মুলায়ম সিং যাদৱ আৰু মায়াৱতী । বিজেপিক প্ৰতিহিত কৰাৰ স্বাৰ্থত এইবাৰ উত্তৰ প্ৰদেশৰ মুলায়ম নেতৃত্বাধীন সমাজবাদী পাৰ্টি আৰু মায়াৱতী নেতৃত্বাধীন বহুজন সমাজ পাৰ্টি (বি এছ পি)য়ে মিত্ৰতাৰে লোকসভা নিৰ্ব্বাচনত প্ৰতিদ্বন্দ্বিতা কৰিছে । ইয়াক লৈ হৈ থকা চৰ্চাই আজি বিশেষ মাত্ৰা লাভ কৰে। কাৰণ আজি এক নিৰ্ব্বাচনী সভাত মুলায়ম আৰু মায়াৱতীক একেখন মঞ্চতে দেখা যায় । সভাখন মুলায়মৰ সমৰ্থনত আয়োজন কৰা হৈছিল । একালৰ ঘোৰ শত্ৰু মুলায়মৰ সমৰ্থনত প্ৰচাৰ চলোৱা উদ্দেশ্যে তেওঁৰ সমষ্টি মেইনপুৰীত আয়োজিত সভাখনত মায়াৱতীও অংশ লয়। যি এক বিৰল ঘটনা বুলি ৰাজনৈতিক বিশ্লেষকসকলে আখ্যা দিছে । মুলায়মৰ স’তে একেখন মঞ্চতে আসন গ্ৰহণ কৰাই নহয়, মুলায়মক প্ৰশংসাৰেও উপচাই পেলায় মায়াৱতীয়ে। মুলায়মক প্ৰশংসা কৰিবলৈ গৈ মায়াৱতীয়ে নৰেন্দ্ৰ মোদীক ভেজাল আখ্যা দিয়ে।