তিনি দশকৰ পাছতো সম্পূৰ্ণ ন’হল ধিং নগৰ পানী যোগান আঁচনি

নগাঁও: নিচেই সাধাৰণ এখন পানী যোগান আঁচনিৰ নিৰ্মাণ কাৰ্য সম্পূৰ্ণ ন’হল সুদীৰ্ঘ তিনিটা দশকৰ পাছতো। ৩১ বছৰৰ আগতেই নিৰ্মাণ কাৰ্য আৰম্ভ কৰা এই পানী যোগান আঁচনি খনৰ অৱস্থা এতিয়া খনন কাৰ্যত উদ্ধাৰ হোৱা পুৰাতাত্বিক সম্পদৰ লেখিয়া হৈছে।কেবাখনো চৰকাৰৰ অদক্ষতাৰ স্বাক্ষৰ বহন কৰি থকা এই আজৱ পানী যোগান আঁচনি খন আছে নগাঁও জিলাৰ ধিং চহৰৰ মাজমজিয়াত।তদানীন্তন অসম গণ পৰিষদ চৰকাৰৰ আমোলত ১৯৮৮তে নগাঁও জিলাৰ ধিং চহৰৰ মাজ মজিয়াত ১.৫৭কোটি টকা ব্যয় সাপেক্ষে আৰৱান ৱাটাৰ চাপ্লাই এণ্ড চিৱেৰজ বৰ্ড কৰ্তৃপক্ষই নিৰ্মাণ আৰম্ভ কৰিছিল পানী যোগান আঁচনি খনৰ কাম।ধিং চহৰৰ মাজ মজিয়াৰ এক বৃহৎ এলেকাত প্ৰকল্পটোৰ নিৰ্মাণ কাৰ্য আৰম্ভ কৰিছিল যদিও নিৰ্মাণৰ প্ৰাৰম্ভিক স্তৰতে অতি ৰহস্যজনক কাৰণত ইয়াৰ কাম বন্ধ হৈ পৰে।আবন্টিত ধনৰে ঠিকাদাৰ গোষ্ঠী”সুভাষ প্ৰজেক্ট”য়ে প্ৰকল্পটোৰ পাম্পিং হাউচ, মূল জলাধাৰ, কেমিকেল হাউচ, ক্লিয়াৰেন্স ৰিজাৰ্ভাৰ কে ধৰি কেতবোৰ অংশৰ নিৰ্মাণ কাৰ্য আৰম্ভ কৰিছিল।কিন্তু এই নিৰ্মাণ কাৰ্য আৰম্ভ কৰাৰ পূৰ্বে কৰা ক্ৰূটিপূৰ্ণ ভূমি পৰীক্ষা, বিভাগীয় প্ৰাককলন অনুসৰি নিৰ্মাণ কাৰ্য আৰম্ভ নকৰা, নিৰ্মাণ কাৰ্যত অতি নিম্নমানদণ্ডৰ সামগ্ৰী ব্যৱহাৰ কৰা আদি বিভিন্ন কাৰণৰ পৰিপ্ৰেক্ষিতত ১৯৮৮চনতে নিৰ্মাণ কাৰ্য প্ৰায় সম্পূৰ্ণ হোৱা মূল জলাধাৰটোৰ ছাদ খন ভাগি পৰে।তেতিয়ালৈকে প্ৰকল্পটোৰ প্ৰায় ৬০ লাখ টকা ব্যয় কৰা হৈছিল।ছাদখন ভাগি পৰাৰ পাছত প্ৰায় তিনি বছৰ কাল বন্ধ হৈ থাকে নগৰ পানী যোগান প্ৰকল্পটোৰ নিৰ্মাণ কাৰ্য।পিছত ১৯৯১ চনত ভাগি পৰা মূল জলাধাৰৰ ছাদখন সম্পূৰ্ণকৈ ভাঙি পেলোৱা হয়।ইয়াৰ সাত বছৰৰ পাছত ১৯৯৭চনত অৰ্ধনমিত, পৰিত্যক্ত পানী যোগান আঁচনি খনৰ নিৰ্মাণ কাৰ্য পুনৰ আৰম্ভ কৰাৰ সলনি কেৱালাখ টকা ব্যয় কৰি ইয়াৰ চৌহদত পকী বেৰা নিৰ্মাণৰ কাম আৰম্ভ কৰা হয়।স্মৰ্তব্য যে, ধিং নগৰ পানী যোগান প্ৰকল্পটো আৰম্ভ কৰাৰ লগে লগেই এই প্ৰকল্পটোৰ বিপৰীতে এজন কণিষ্ঠ অভিযন্তা, এজন শাখা সহায়ক আৰু এজন পাম্প অপাৰেটৰকে ধৰি মুঠ সাত জন কৰ্মচাৰীকো নিয়ুক্তি দিয়া হৈছিল।কিন্তু প্ৰকল্পটোৰ নিৰ্মাণ কাৰ্য বন্ধ হৈ পৰাত আটাইকে স্হানান্তৰ কৰা হয়।আনহাতে,১৯৯৭চনত প্ৰকল্পটোৰ কাম আধাতে এৰি ঠিকাদাৰ গোষ্ঠীয়ে প্ৰকল্প ক্ষেত্ৰ ত্যাগ কৰে। তেতিয়াৰ পৰাই আজি পৰ্যন্ত এই পানী যোগান প্ৰকল্পটো হাবি জংঘলৰ মাজত পৰিত্যক্ত অৱস্হাত আছে।ইপিনে, এই সময় ছোৱাৰ ভিতৰতে প্ৰকল্পটোৰ অৰ্ধনমিত অংশও ভাঙি চিঙি উৱলি যোৱা পৰিলক্ষিত হৈছে।পৰিত্যক্ত মূল জলাধাৰটো এতিয়া বিভিন্ন সৰীসৃপ, বেঙৰ আৱাস স্হলীলৈ পৰ্যৱসিত হৈছে।ইয়াৰ সামন্তৰালকৈ পানী যোগান প্ৰকল্পটোৰ চৌহদৰ কে’বা বিঘা মাটিত বেদখল আৰম্ভ হৈছে।আনকি একাংশ লোকে ইয়াৰ পকী বেৰা পৰ্যন্ত ভাঙি পেলোৱা পৰিলক্ষিত হৈছে।ধিং চহৰৰ ৰাইজক বিশুদ্ধ খোৱাপানী যোগান ধৰাৰ লক্ষ্যৰে নিৰ্মাণ কৰিবলৈ যোৱা এই পানীযোগান আঁচনি খনটো সম্পূৰ্ণ হৈ নুঠিলেই ইয়াৰ নামত ৰাজহুৱা ধনৰ ১কোটি৫৭ লাখ ৰ চৰম অপব্যয়হে কৰা হ’ল।