পৰ্যটকৰ বাবে বন্ধ পবিতৰা অভয়াৰণ্য

জাগীৰোড : সকলো দেশী – বিদেশী পৰ্যটকৰ বাবে আজিৰ পৰা পবিতৰা অভয়াৰণ্য বন্ধ ঘোষণা কৰিছে অভয়াৰণ্য খনৰ কৰ্তৃপক্ষই। চলিত বৰ্ষৰ ৩০ ছেপ্টেম্বৰলৈ বন্ধ থাকিব পবিতৰা অভয়াৰণ্য। অভয়াৰণ্যখনৰ বনাঞ্চলিক বিষয়া মুকুল তামুলীয়ে জনোৱা মতে, বাৰিষাৰ আগমণৰ লগে লগে অভয়াৰণ্যখনৰ অন্তৰ্ভাগৰ বাট-পথবোৰ বোকাময় হোৱাৰ কাৰণেই বন্ধ কৰি দিয়া হৈছে জীপ ছাফাৰী আৰু হাতী ছাফাৰী। পবিতৰা অভয়াৰণ্য কৰ্তৃপক্ষই অগ্ৰদূতৰ আগত সদৰি কৰা মতে বিগত বৰ্ষৰ তুলনাত চলিত বৰ্ষত অভয়াৰণ্য দৰ্শন কৰিবলৈ অহা পৰ্যটকৰ সংখ্যা বৃদ্ধি পাইছে। এশিঙীয়া গঁড়ৰ বাবে বিখ্যাত পবিতৰাত বিগত ২০১৭-১৮ বৰ্ষত দেশী – বিদেশী পৰ্যটকৰ পৰা প্ৰায় ৪৫,৪৩,৭৫০ টকাৰ ৰাজহ আদায় কৰাৰ বিপৰীতে ২০১৮-১৯ বৰ্ষত দেশী – দিদেশী পৰ্যটকৰ পৰা প্ৰায় ৬১,৯২,১২৫০ টকাৰ ৰাজহ আদায় কৰি বিগত বৰ্ষৰ অভিলেখ ভংগ কৰিবলৈ সক্ষম হৈছে। ইয়াৰে ৩৪,৬০৬ জন দেশী আৰু ৬০৫ জন বিদেশী পৰ্যটকে এই বাৰ পবিতৰা অভয়াৰণ্যৰ সৌন্দৰ্য্য উপভোগ কৰে।প্ৰায় ১৬ বৰ্গকিলোমিটাৰ অঞ্চল আগুৰি থকা পবিতৰা অভয়াৰণ্যত প্ৰায় ১০২ টা গঁড়, দুই শতাধিক বনৰীয়া মহ , সহস্ৰাধিক বনগাহৰি আৰু কেইবাটাও প্ৰজাতিৰ জীৱ-জন্তু আছে। আনহাতে আগন্তুক বাৰিষাত অসম গৌৰৱ এশিঙীয়া গঁড়ৰ লগতে বন্যজন্তুসমূহক ৰক্ষণাবেক্ষণ দিবলৈ পবিতৰাৰ বনবিভাগ ইতিমধ্যে সাজু হৈ উঠিছে।