দুষ্পাপ্য ধনেশ পক্ষী পুহি বিখ্যাত মৰাণৰ ভৰত বৰা

খোৱাং: যি সময়ত মানুহৰ মাজত বন ধ্বংসৰ প্ৰৱণতা গঢ়ি উঠিছে । সেই সময়তেই প্ৰকৃতি ৰক্ষাৰ এক সুন্দৰ নিদৰ্শন দাঙি ধৰিছে মৰাণ পথালিবাম গাঁ‌ৱৰ ভৰত বৰাই । তেওঁ নিজা প্ৰচেষ্টাৰে বনৰীয়া জীৱ জন্তু সুৰক্ষা দি ঘৰতেই গঢ়ি তুলিছে এখন চিৰিয়াখানা। বিগত প্ৰায় ২০ বছৰে এই লোকজনে ঘৰৰ চৌহদত পুহিছে ধনেশ পক্ষী, বৰটোকোলা, বাঘ, বগলীকে ধৰি বহু পহু-পক্ষী । প্ৰকৃতি প্ৰেমী লোকজনে অঞ্চলটোৰ বিভিন্ন স্থানত গছপুলি ৰোপণ কৰি প্ৰকৃতি ৰক্ষাৰ ক্ষেত্ৰত এক সুন্দৰ পদক্ষেপ গ্ৰহণ কৰিছে । তেওঁ জানিবলৈ দিয়াৰ মতে মৰাণ অঞ্চলৰ বহুতো আঘাত প্ৰাপ্ত পক্ষীক তেওঁ শুশ্ৰূষা কৰি পুনৰ অৰণ্যত এৰি দিয়ে । আনহাতে তেওঁৰ তত্ত্বাৱধানত থকা বনৰীয়া পহু-পক্ষী বিলাক চাবলৈ দেশী-বিদেশী বহু পৰ্য্যতকৰ আগমন ঘটিছে বৰাৰ ঘৰলৈ । তেওঁৰ আহ্বানত ইতিমধ্যে “সেউজ, ধনেশ পক্ষী আৰু প্ৰকৃতি সুৰক্ষা সমিতি” নামৰ এটা সংগঠনো গঠিত হৈছে । এই সংগঠনটোৱেও প্ৰকৃতি ৰক্ষাৰ ক্ষেত্ৰত বহুতো ভূমিকা গ্ৰহণ কৰিছে । সম্প্ৰতি সমগ্ৰ গাওঁখনতে মুক্ত মনে বিচৰণ কৰি ফুৰে দুষ্পাপ্য বহু ধনেশ পক্ষীয়ে । যাৰ বাবে গাওঁখনক নাম দিয়া হৈছে ধনেশ পক্ষী গাওঁ । ইফালে চৰকাৰী কোনো সাহাৰ্য্যই ঢুকি নোপোৱা মৰাণ পথালিবাম গাঁ‌ৱৰ এই ব্যক্তিজনৰ কৰ্মকাণ্ড সঁ‌চাকৈয়ে প্ৰশংসনীয় ।