ঢেকিয়াজুলিৰ হুগ্ৰাজুলি পশু স্বাস্থ্য কেন্দ্ৰত আঠ বছৰে ওলমিছে তলা

অগ্ৰদূত বাৰ্তা,ঠেলামৰা,২ডিচেম্বৰঃ
হুগ্ৰাজুলি পশু স্বাস্থ্য কেন্দ্ৰত বিগত আঠ বছৰ ধৰি তলা ওলমি থকাৰ ফলত পশুধন পালন কৰা কৃষক ৰাইজে ভীষণ অসূবিধাৰ সন্মূখীন হৈছে৷ ইয়াত বিগত আঠ বছৰে নাই চিকিৎসক কৰ্মচাৰীও৷ঢেকিয়াজুলিৰ হুগ্ৰাজুলিৰ অমিয়পুৰ পঞ্চায়তৰ ৯০শতাংশ লোকে পশুধন পালন কৰে I তেনে পৰিপেক্ষিতত পশু স্বাস্থ্য কেন্দ্ৰটো বন্ধ হৈ থকাত কৃষক সকলে বহু অসূবিধাৰ সন্মূখীন হৈছে৷হুগ্ৰাজুলি পশুস্বাস্থ্য কেন্দ্ৰ বন্ধ হৈ থকাত স্থানীয় পাচনৈ শাখা ছাত্ৰ সন্থাৰ সভাপতি কল্পজ্যোতি নাথ ,সম্পাদক কৌশিক পাপুল নাথে তীব্ৰ ক্ষোভ প্ৰকাশ কৰি হুগ্ৰাজুলি পশু স্বাস্থ্য কেন্দ্ৰ মেৰামতি, চিকিৎসক -কৰ্মচাৰীৰ ব্যৱস্থা , পশুপালন কৰা কৃষক ৰাইজক উপকৃত হোৱাকৈ ব্যৱস্থা গ্ৰহন কৰিবলৈ বিভাগীয় কৰ্তৃপক্ষ আৰু জিলা উপায়ুক্ত উপায়ুক্তক দাবী জনাইছে৷