কৰ’না ভাইৰাছৰ উপস্থিতি ধৰা পৰা তিনিজন কৰ’না ভাইৰাছ সংক্ৰমিত ৰোগীক কেন্দ্ৰ কৰি আজি গোৱালপাৰা অসামৰিক চিকিৎসালয়ত হাহাকাৰ অৱস্থাৰ সৃষ্টি হয়।ক’ভিড-১৯ ৰোগীক চিকিৎসা কৰিব পৰাকৈ প্রয়োজনীয় সা-সুবিধা উপলব্ধ নথকা বাবে আতংকিত হৈ পৰা চিকিৎসালয়খনৰ চিকিৎসক তথা চিকিৎসাকৰ্মী সকলে প্ৰতিবাদত মুখৰ হৈ দায়িত্বৰ পৰা বিৰত থকাৰ সিদ্ধান্ত লয়। যোৱা নিশা গোৱালপাৰা জিলাৰ তিনিজন লোকে কৰ’না ভাইৰাছত আক্ৰান্ত হোৱাটো নিশ্চিত হোৱাৰ পাছত তেওঁলোকক অসামৰিক চিকিৎসালয়ত প্ৰতিষ্ঠা কৰা আছুতীয়া কক্ষত ৰখাৰ ব্যৱস্থা কৰা হৈছিল। কিন্তু চিকিৎসালয়খনত বিশেষ সুৰক্ষামূলক ব্যৱস্থা নথকাৰ বাবে চিকিৎসাকৰ্মীসকল আতংকিত হৈ পৰে।
উল্লেখ্য যে, কৰ’নাত আক্ৰান্ত সন্দেহত বিগত কিছুদিন ধৰি জিলাখনৰ বহুতকে পৰীক্ষা কৰা হৈছিল। ইয়াৰে অধিকাংশৰে পৰীক্ষাত নিগেটিভ ওলালেও দিল্লীৰ নিজামুদ্দিন মাৰ্কাজলৈ যোৱা গোৱালপাৰাৰ তিনিজন লোকৰ শৰীৰত কৰ’না ভাইৰাছৰ নমুনা পায়। ইয়াৰ পিছতে তিনিওজনক নিজক নিৰাপত্তাক লৈ ফৰেষ্ট গেটৰ নগৰ স্বাস্থ্য আৰু কল্যাণ কেন্দ্ৰৰ পৰা গোৱালপাৰা অসামৰিক চিকিৎসালয়লৈ অনা হয় যদিও নিজৰ নিৰাপত্তাক লৈ শংকিত হৈ পৰে চিকিৎসালয়খনৰ একাংশ চিকিৎসক, নাৰ্ছ তথা অন্যান্য স্বাস্থ্যকৰ্মী। অন্যহাতে, মাৰাত্মক কৰ’না ভাইৰাছৰ স’তে মোকাবিলা কৰাৰ বাবে চিকিৎসালয়খনত কোনো প্ৰশিক্ষণপ্রাপ্ত চিকিৎসক নাই
ইপিনে , এই প্ৰতিবাদৰ মাজতে ভোকত থকা ক’ভিড-১৯ত আক্ৰান্ত ৰোগী তিনিজনে সকলোৰে অলক্ষিতে খাদ্য বিচাৰি চিকিৎসালয়ৰ বাহিৰলৈ ওলাই আহে। অৱশ্যে চিকিৎসালয় কৰ্তৃপক্ষই তেওঁলোকক প্ৰত্যক্ষ কৰাৰ লগে লগেই পুনৰ আছুতীয়া কক্ষলৈ ঘূৰাই পঠায়। খাদ্য যোগান নথকাৰ বাবেই ৰোগী তিনিজন এইদৰে ওলাই অহা বুলি অভিযোগ উঠিছে।