কৰ’না আক্ৰান্ত দেশসমূহক খৰখেদাকৈ তলাবন্ধ প্ৰত্যাহাৰ নকৰিবলৈ সতৰ্কবাণী প্ৰেৰণ কৰিছে বিশ্ব স্বাস্থ্য সংস্থাই। হু’ৱে কয় যে তলাবন্ধ প্ৰত্যাহাৰৰ বিষয়ত খৰখেদা কৰা উচিত নহয়। তাৰ পৰিণাম ভয়াবহ হ’ব পাৰে। এই ভাইৰাছে ভয়ংকৰ ৰূপ লৈ পুনৰ আহিব পাৰে। সংস্থাৰ মতে তলাবন্ধ প্ৰত্যাহাৰ কৰিলেও কৌশলগতভাৱে লাহে লাহে কৰিব লাগে।
কৰ’না আতংকৰ ফলত বিশ্বৰ বহু দেশত সম্পূৰ্ণৰূপে তলাবন্ধ অব্যাহত হৈ পৰিছে। ইয়াৰ ফলত বিশ্বজুৰি কোটি কোটি মানুহে চাকৰি হেৰুৱাব পাৰে। আন্তৰ্জাতিক মুদ্ৰানিধিৰ মতে বিশ্ব ২০১৯ তকৈ ভয়াবহ আৰ্থিক মন্দাৱস্থাৰ দিশলৈ আগুৱাইছে। এই পৰিস্থিতিত আৰ্থিক মন্দাৱস্থাৰ প্ৰভাৱ হ্ৰাস কৰিবলৈ তলাবন্ধ প্ৰত্যাহাৰ কৰিবলৈ বহু দেশে চিন্তা-চৰ্চা আৰম্ভ কৰিছে। এনে দেশসমূহক সকীয়াই দিছে বিশ্ব স্বাস্থ্য সংস্থাই।
সংস্থাৰ মুৰব্বী টেডৰ’জ আধানম গেব্ৰিয়োছছে কৰ’না আক্রান্ত দেশসমূহক খৰখেদাকৈ প্ৰত্যাহাৰ নকৰাৰ পৰামৰ্শ দিয়ে। তেওঁ কয়, ‘বিগত সপ্তাহত ইউৰোপৰ কেইবাখনো দেশৰ পৰা আশাপ্ৰদ বাতৰি আহিছে। স্পেইন, ইটালী, জাৰ্মানী, ফ্ৰান্সৰ দৰে দেশসমূহৰ পৰা ভাল খবৰ আহিছে। খৰখেদা কৰিলে তলাবন্ধৰ পৰৱৰ্তী পৰিস্থিতি পূৰ্বৰ পৰিস্থিতিৰ দৰে হ’ব।’ টেডৰ’জে পূৰ্বতেও কৈছিল কৰ’না ভাইৰাছ ৰোধিবলৈ কেৱল তলাবন্ধ উপযুক্ত পন্থা নহয়। এই সংক্ৰমণ ৰোধ কৰিবলৈ আক্ৰমণাত্মক হ’ব লাগিব। ইয়াৰ বাবে প্ৰয়োজন আন্তঃ গাঁথনিৰ তথা অধিক সংখ্যক লোকৰ স্বাস্থ্য পৰীক্ষা আৰু চিকিৎসা ব্যৱস্থা।