ন’ভেল কৰ’না ভাইৰাছৰ কবলত পৰি ভয়ানকভাৱে ক্ষতিগ্ৰস্ত হোৱা দেশসমূহৰ অন্যতম ইংলেণ্ড। ইয়াৰ বিপৰীতে ভাৰতত সংক্ৰমণ ব্যাপক ৰূপ ধাৰণ কৰিলেও সেই অনুপাতে মৃতকৰ সংখ্যা কম । অথচ ইংলেণ্ডত মৃত্যু হোৱা লোকসকলৰ ভিতৰত বেছি সংখ্যকে ভাৰতীয় বংশোদ্ভৱ। প্ৰকাশিত তথ্য অনুসৰি , ইংলেণ্ডত মৃতকৰ তালিকাত ভাৰতীয় মূলৰ লোকৰ সংখ্যা পাছতে আছে কেৰিবিয়ান আৰু পকিস্তানী লোকৰ সংখ্যা ।
এন এইছ এছৰ পৰা প্ৰকাশ প্ৰতিবেদনত উল্লেখ কৰা হৈছে যে ন’ভেল কৰ’না ভাইৰাছৰ সংক্ৰমণ আৰম্ভ হোৱাৰ পাছৰে পৰা ১৭ এপ্ৰিল পৰ্যন্ত ইংলেণ্ডত ১৩হেজাৰ ৯১৮জন লোকৰ মৃত্যু হৈছে । ইয়াৰ ভিতৰত ১৬.২ শতাংশই হৈছে কৃষ্ণাংগ, এছীয় আৰু সংখ্যালঘু জনগোষ্ঠী । এই কৃষ্ণাংগ, এছীয় আৰু সংখ্যালঘু সকলৰ ভিতৰত তিনি শতাংশই হৈছে ভাৰতীয় বংশোদ্ভৱ । এতিয়া ইংলেণ্ডত সৰ্বত্ৰে সামগ্ৰিকভাৱে কৰ’নাৰ পৰীক্ষা সম্ভৱ হোৱা নাই । ফলত এই পৰিসংখ্যাত কিছু তাৰতম্য ঘটিব পাৰে বুলি বিশেষজ্ঞসকলে ধাৰণা কৰিছে ।
এন এইছ এছৰ পৰিসংখ্যাত লগতে দেখা গৈছে যে কৰ’না ভাইৰাছ সংক্ৰমণত মৃত্যুৰ নিৰিখত ইংলেণ্ডত থকা কৃষ্ণাংগ, এছীয় আৰু সংখ্যালঘু সম্প্ৰদায়ৰ লোকৰ সংখ্যা আনসকলৰ তুলনাত বেছি । মিশ্রিত জনগোষ্ঠীৰ ক্ষেত্ৰত মৃত্যুৰ হাৰ ০.৭শতাংশ।কেৱল সেইয়াই নহয়, এন এইচ এছৰ স্বাস্থ্যকৰ্মী সকলৰ ভিতৰত যিসকলৰ ক’ভিড- ১৯ ত আক্ৰান্ত হৈ মৃত্যু হৈছে, তেওঁলোকৰ ভিতৰতো আগবাঢ়ি আছে কৃষ্ণাংগ, এছীয় আৰু সংখ্যালঘু সম্প্ৰদায় সমূহেই । এন এইচ এছৰ পৰিসংখ্যা অনুসৰি, এই জনগোষ্ঠী সমূহৰ ৬৯জনৰ কৰ’নাত মৃত্যু হৈছে ।