সোমাবাৰে মহানগৰীৰ আদাবাৰীত সংঘটিত হয় এক অগ্নিকাণ্ড

ৰাজধানী  মহানগৰীৰ জালুকবাৰী আৰক্ষী থানাৰ অধীনস্থ আদাবাৰী তিনিআলিত সোমাবাৰে সংঘটিত এক অগ্নিকাণ্ডৰ ফলত দুখন দুচকীয়া বাহনসহ বহু সা–সামগ্রী ভস্মীভূত হয় ৷ বন্ধ অৱস্থাত থকা আদাবাৰী তিনিআলিস্থিত গুপ্তা গেৰেজত  হঠাতে জুইৰ সূত্রপাত হোৱাত  জুইৰ লেলিহান শিখাই মুহূর্ততে গেৰেজ আৰু গেৰেজ সংলগ্ন গুদাম ঘৰটো আৱৰি ধৰে ৷ অগ্নিকাণ্ডৰ খবৰ পাই ঘটনাস্থলীত  পাণ্ডু অগ্নির্বাপক বাহিনীৰ দুখন বাহনে উপস্থিত হৈ প্রায় এঘণ্টাজোৰা  প্ৰচেষ্টাত জুই নির্বাপণ কৰিবলৈ সক্ষম হয় ৷

উল্লেখ্য যে এই অগ্নিকাণ্ডৰ ফলত গেৰেজটোত থকা দুখন স্কুটী আৰু গুদাম ঘৰৰ বহু সা–সামগ্রী ভস্মীভূত হয়৷ অগ্নিকাণ্ডৰ প্রকৃত কাৰণ জানিব পৰা হোৱা নাই যদিও শ্বর্ট শ্বার্কিটৰ ফলতে সংঘটিত হোৱা বুলি আৰক্ষীয়ে সন্দেহ ব্যক্ত কৰিছে ৷