Panchayat elections:
পঞ্চায়ত নিৰ্বাচনত বিজেপিয়ে বিপুল সংখ্যক আসন লাভ কৰিব। মানুহে ভোট দিব নৰেন্দ্ৰ মোদী, ড০ হিমন্ত বিশ্ব শৰ্মা আৰু বিজেপিক।- এই মন্তব্য মন্ত্ৰী পীযুষ হাজৰীকাৰ।
অসমৰ পঞ্চায়ত নিৰ্বাচন সন্দৰ্ভত আজি ৰাষ্ট্ৰীয় সংবাম মাধ্যম এএনআইৰ আগত এই মন্তব্য কৰে মন্তব্য কৰে মন্ত্ৰীগৰাকীয়ে। মন্ত্ৰীগৰাকীয়ে কয়, ‘মই বিশ্বাস কৰো যে বিজেপিয়ে বিপুল সংখ্যক আসন লাভ কৰিব। অসমৰ ৰাইজে কংগ্ৰেছক ভোট দিব বুলি মই নাভাবো। কিয়নো আমাৰ চৰকাৰে বহুত কাম কৰিছে। নৰেন্দ্ৰ মোদীয়ে দেশৰ বাবে বহুত কাম কৰিছে।
বিজেপিয়ে দেশ আৰু ৰাজ্যৰ বাবে বহু কাম কৰিছে। যাৰ বাবে জনসাধাৰণ বহুত সুখী। এতিয়া ৰাস্তা-ঘাটৰ অৱস্থা বহুত ভাল হৈছে, আমি ডেৰ লাখ নিৱনুৱাক চাকৰি দিছো, য’ত এটাও দুৰ্নীতিৰ অভিযোগ উত্থাপন হোৱা নাই। সেয়ে ৰাইজে বিজেপিক ভোট দিব।
বিৰোধীৰ স্থিতি সন্দৰ্ভত সাংবাদিকে জানিবলৈ বিচৰাত মন্ত্ৰীগৰাকীয়ে কয় যে অসমত কোনো শক্তিশালী বিৰোধী নাই। কংগ্ৰেছৰ বিধ্বস্ত হৈছে। আনহাতে, অহা আঠ ছেপ্টেম্বৰত প্ৰধানমন্ত্ৰী নৰেন্দ্ৰ মোদী অসমলৈ আহিব।
প্ৰধানমন্ত্ৰীৰ এই ভ্ৰমণক লৈ মন্ত্ৰীগৰাকীয়ে কয় যে সুধাকণ্ঠ ড°ভূপেন হাজৰিকাৰ এশ বছৰীয়া জয়ন্তীৰ কাৰ্যসূচীত উপস্থিত থাকিব প্ৰধানমন্ত্ৰী নৰেন্দ্ৰ মোদী, এয়া আমাৰ বাবে আনন্দৰ কথা, গৌৰৱৰ বিষয়।
ইপিনে, মন্ত্ৰীগৰাকীয়ে আজি পুৱা ভাৰতীয় জনতা পাৰ্টি, অসম প্ৰদেশৰ বশিষ্ঠস্থিত মুখ্য কাৰ্যালয় অটল বিহাৰী বাজপেয়ী ভৱনত ‘পঞ্চায়ত নিৰ্বাচন প্ৰবন্ধন কাৰ্যালয়-২০২৫’ মুকলি অনুষ্ঠানত উপস্থিত থাকে।
পঞ্চায়ত নিৰ্বাচন প্ৰবন্ধন সমিতিৰ বিষয়াসকলৰ স’তে মন্ত্ৰীগৰাকীয়ে এক বৈঠকত মিলিত হৈ আগন্তুক পঞ্চায়ত নিৰ্বাচনকেন্দ্ৰিক বহুকেইটা গুৰুত্বপূৰ্ণ বিষয়ত সমিতিৰ বিষয়ববীয়াসকলৰ সৈতে আলোচনা কৰে। উল্লেখ্য যে গাঁও অঞ্চলৰ উন্নয়ন তথা বিকাশৰ বাবে পঞ্চায়ত নিৰ্বাচনৰ যথেষ্ট ভূমিকা আছে।
সমাগত পঞ্চায়ত নিৰ্বাচন সুকলমে তথা সফলতাৰে পৰিচালনা কৰাৰ লক্ষ্যৰে তথা ভাৰতীয় জনতা পাৰ্টি মিত্ৰজোঁটৰ প্ৰাৰ্থীৰ জয় সুনিশ্চিত কৰাৰ বাবে দলে গুৰুত্বসহকাৰে পদক্ষেপ গ্ৰহণ কৰি আছে।
আজি এই উদ্দেশ্যে ভাৰতীয় জনতা পাৰ্টি, অসম প্ৰদেশৰ বশিষ্ঠস্থিত মুখ্য কাৰ্যালয় অটল বিহাৰী বাজপেয়ী ভৱনত ‘পঞ্চায়ত নিৰ্বাচন প্ৰবন্ধন কাৰ্যালয়-২০২৫’ মুকলি কৰা হয়।
আজিৰ এই কাৰ্যসূচীত মন্ত্ৰীগৰাকীৰ সৈতে বিজেপি অসম প্ৰদেশৰ প্ৰভাৰী হৰিশ দ্বিবেদী, সাংগঠনিক সাধাৰণ সম্পাদক জি আৰ ৰবীন্দ্ৰ ৰাজু, উপ-সভাপতি অশোক ভট্টৰায়সহ বহুকেইগৰাকী কাৰ্যকৰ্তা উপস্থিত থাকে।
ইয়াৰ পাছত মন্ত্ৰীগৰাকীয়ে হাজোত উপস্থিত হয়। কিছুদিন পূৰ্বে মৃত্যু ঘটা হাজোৰ ন-কুছি অঞ্চলৰ বিশিষ্ট ব্যক্তি, ভৰলুমুখস্থিত সোণাৰাম উচ্চতৰ মাধ্যমিক বিদ্যালয়ৰ অৱসৰপ্ৰাপ্ত শিক্ষক জয়কান্ত শৰ্মাৰ বাসগৃহত উপস্থিত হৈ মৃতকৰ প্ৰতি শ্ৰদ্ধাঞ্জলি জ্ঞাপন কৰি বিদেহ আত্মাৰ চিৰশান্তি কামনা কৰাৰ লগতে শোকস্তব্ধ পৰিয়ালবৰ্গক সাক্ষাৎ কৰে।
ইয়াৰ পাছত মন্ত্ৰীগৰাকীয়ে বিয়লি পঞ্চায়ত নিৰ্বাচন সন্দৰ্ভত এখন সংবাদমেল সম্বোধন কৰে। পঞ্চায়ত নিৰ্বাচনৰ বাবে ভাৰতীয় জনতা পাৰ্টি আৰু মিত্ৰজোঁটৰ প্ৰাৰ্থীসকলে বিনা প্ৰতিদ্বন্দ্বিতাৰে জয়লাভ কৰাটো অতিকৈ আনন্দৰ বিষয় বুলি মন্ত্ৰীগৰাকীয়ে সংবাদমেলত উল্লেখ কৰে।
এয়া বিজেপি চৰকাৰখনৰ প্ৰতি থকা জনতাৰ অসীম আস্থা আৰু বিশ্বাসৰ প্ৰতিফলন বুলি তেওঁ মন্তব্য কৰে। অহা দুই আৰু সাত মে’ত হ’বলগীয়া নিৰ্বাচনত বিজেপিয়ে ইতিমধ্যে ৩১ টা জিলা পৰিষদৰ সমষ্টিত বিনা প্ৰতিদ্বন্দ্বিতাৰে জয় লাভ কৰা বুলি মন্ত্ৰীগৰাকীয়ে সংবাদমেলত উল্লেখ কৰে।
আনহাতে, বিজেপিয়ে ২৫৯ টা সমষ্টিত আঞ্চলিক পঞ্চায়তৰ সদস্য পদত বিনা প্ৰতিদ্বন্দ্বিতাৰে জয় লাভ কৰাৰ লগতে মিত্ৰ দল অগপই দুটা জিলা পৰিষদত আৰু আঞ্চলিক পঞ্চায়তৰ ২৯ টা সমষ্টিত বিনা প্ৰতিদ্বন্দ্বিতাৰে জয় লাভ কৰাৰ কথা উল্লেখ কৰে। তেওঁ কয় যে আমি ইতিমধ্যে অসমৰ ৰাইজৰ আশীৰ্বাদ লৈ এই নিৰ্বাচনত যথেষ্ট অগ্ৰগতি লাভ কৰিছো।
প্ৰধানমন্ত্ৰী নৰেন্দ্ৰ মোদীৰ প্ৰতি অসমৰ ৰাইজৰ যথেষ্ট মৰম, শ্ৰদ্ধা, সন্মান আছে বুলি আশা ব্যক্ত কৰি মন্ত্ৰীগৰাকীয়ে কয় যে যোৱা ১১ টা বছৰত নৰেন্দ্ৰ মোদীয়ে অসম তথা উত্তৰ-পূৰ্বাঞ্চলৰ কাৰণে যি কাম কৰিছে কোনো এগৰাকী প্ৰধানমন্ত্ৰীয়ে তেনে কাম কৰা পৰিলক্ষিত হোৱা নাছিল। ৭০ দিনতকৈ অধিক দিন প্ৰধানমন্ত্ৰী নৰেন্দ্ৰ মোদীয়ে অসমত কটাই ইতিমধ্যে অভিলেখ সৃষ্টি কৰা বুলি উল্লেখ কৰি এই অভিলেখক কোনোবাই ভংগ কৰিব পাৰিব বুলি তেওঁৰ সন্দেহ হয় বুলি উল্লেখ কৰে।
এইবিলাক কাৰণতে নৰেন্দ্ৰ মোদী বা বিজেপি দল বা বিজেপিৰ মিত্ৰজোঁটক অসমৰ ৰাইজে মৰম কৰে বুলি তেওঁ উল্লেখ কৰে। ড০ হিমন্ত বিশ্ব শৰ্মাই দিনে ৰাতি অসমখনৰ উন্নতিৰ হকে কাম কৰিবলৈ অহৰহ প্ৰচেষ্টা চলাইছে বুলি তেওঁ সংবাদমেত মন্তব্য কৰে। অসমত চাকৰিৰ ক্ষেত্ৰততেই হওক বা অন্যান্য ক্ষেত্ৰতেই হওক দুৰ্নীতি নাইকিয়া কৰা বুলি মন্ত্ৰীগৰাকীয়ে দৃঢ়তাৰে দাবী কৰে।