কৰ’না ভাইৰাছৰ বাবে চৰম আৰ্থিক সংকটত ভোগা নলবাৰীৰ স্বাভিমান জাপি আৰু বাঁহ-বেত শিল্পী সকলৰ বাবে নলবাৰী জিলা ছাত্ৰ সন্থাই বিশেষ পেকেজ ঘোষণা কৰাৰ বাবে চৰকাৰৰ ওচৰত দাবী উত্থাপন কৰিছে। আজি শিল্পীসকলৰ স্বাৰ্থত জিলা ছাত্ৰ সন্থাই উপায়ুক্তৰ জৰিয়তে মুখ্যমন্ত্ৰীলৈ এখন স্মাৰক পত্ৰ প্ৰদান কৰে। জিলা ছাত্ৰ সন্থাৰ সভাপতি গুনজ্যোতি পাঠক আৰু সাধাৰণ সম্পাদক অক্ষয় ডেকা স্বাক্ষৰিত স্মাৰক পত্ৰত উল্লেখ কৰে যে সম্প্ৰতি কৰ’না ভাইৰাছৰ সংক্ৰমণ ৰোধৰ বাবে অব্যাহত থকা তলাবন্ধৰ ফলত অন্যান্য বহু লোকৰ দৰে নলবাৰী জিলাত বিভিন্ন ঠাইৰ জাপি আৰু বাঁহ-বেতৰ শিল্পৰ লগত জড়িত ব্যক্তিসকলৰ অৰ্থনৈতিক অৱস্থা অতি শোচনীয় হৈ পৰিছে। বজাৰৰ অভাৱত বহু শিল্পীয়ে উৎপাদিত জাপিকে ধৰি আন বাঁহ-বেতৰ সামগ্ৰী সমূহ নষ্ট হোৱাৰ উপক্ৰম হৈছে। তেনে অৱস্থাত নলবাৰীৰ স্বাভিমান জাপি শিল্পৰ লগত জড়িত আৰু বাঁহ-বেতৰ শিল্পী সকলৰ পৰিয়াল সমূহে ভাতমুঠিৰ বাবেও হাহাকাৰ কৰিবলগীয়া হৈছে বুলি উল্লেখ কৰি এই শিল্পী সকলৰ বাবে অতি সোনকালেই যে বজাৰৰ সৃষ্টি হ’ব সেয়াও অনিশ্চিত হৈ পৰিছে বুলি স্মাৰক পত্ৰত উল্লেখ কৰে। সেয়ে উক্ত শিল্পী সকলক তাৎক্ষণিকভাৱে সকাহ দিয়াৰ বাবে ৰাজ্য চৰকাৰৰ তৰফৰ পৰা বিশেষ পেকেজ ঘোষণা কৰিবলৈ স্মাৰক পত্ৰৰ জৰিয়তে দাবী জনায়।
আনহাতে কৰ’নাৰ ত্ৰাসৰ সময়ত সমগ্ৰ দেশজুৰি অব্যাহত থকা তলাবন্ধৰ সুযোগ লৈ নলবাৰী জিলাৰ একাংশ মুনাফালোভী প্ৰতিষ্ঠিত ব্যৱসায়ীয়ে নিৰ্দ্ধাৰিত দামতকৈ চ’ৰা দামত সামগ্ৰী বিক্ৰী কৰি সাধাৰণ ৰাইজক মাধমাৰ শোধোৱা বুলি অভিযোগ কৰিছে। চৰকাৰী নীতি নিয়ম মতে সামগ্ৰী আৰু সেৱা কৰৰ (GST) বিল খুচুৰা ব্যৱসায়ী সকলক প্ৰদান কৰিব লাগে যদিও একাংশ ব্যৱসায়ীয়ে উকা কাগজত কেচমেমো দি লক্ষ লক্ষ টকাৰ ৰাজহ ফাকি দিয়া বুলিও অভিযোগ কৰি নলবাৰী জিলা ছাত্ৰ সন্থাই উপায়ুক্তক এখন পৃথক স্মাৰক পত্ৰ প্ৰদান কৰে। স্মাৰক পত্ৰৰ জৰিয়তে কয় যে ইতিমধ্যে এই ক্ষেত্ৰত নলবাৰী সদৰ থানাত এখন এজাহাৰ দাখিল কৰিছে। উক্ত ঘটনা সন্দৰ্ভত নিৰপেক্ষ তদন্ত কৰি দোষীক দৃষ্টান্তমূলক কঠোৰ শাস্তি প্ৰদানৰ দাবী জনায়। উল্লেখ্য যে নলবাৰী জিলা ছাত্ৰ সন্থাৰ সভাপতি গুণজ্যোতি পাঠক, সাধাৰণ সম্পাদক অক্ষয় ডেকা আৰু সদৌ অসম ছাত্ৰ সন্থাৰ ৰাজ্যিক কাৰ্যনিবাহক ভৱজিৎ বেজবৰুৱাৰ নেতৃত্বত এটি সজাতি দলে পৃথকে পৃথকে স্মাৰক পত্ৰ প্ৰদান কৰে।