মায়ানগৰী মুম্বাইৰ বলীউড জগতখনৰ কথাই সুকীয়া ৷ সেয়া ব্যৱসায় ক্ষেত্ৰতে হওক বা প্ৰেম,বিবাহৰ ক্ষেত্ৰতে হওক ৷ কাৰণ বিগত সময়ত বলীউডৰ অভিনেতা কাৰ্তিক আয়ানৰ নাম সাৰা আলি খান আৰু অনন্যা পাণ্ডেৰ লগত সাঙুৰ খাইছিল । সম্প্ৰতি কাৰ্তিকৰ নাম জড়িত হৈ পৰিছে জাহ্নৱী কাপুৰৰ লগত ৷ কিন্তু বলীউড হাংগামাই লোৱা এক সাক্ষাৎকাৰত কাৰ্তিকে জটিলতাৰে কয় “জাহ্নৱীৰ দৰে প্ৰতিভাৱান এগৰাকী অভিনেত্ৰীয়ে যদি মোৰ ছাৰ্টও পিন্ধে ৷ তেন্তে মই বহুত সুখী হ’ম ৷” সম্প্ৰতি কাৰ্তিকৰ জাহ্নৱীৰ সন্দৰ্ভত দিয়া উত্তৰ অনুৰাগীসকলৰ কাৰণে হৈ পৰিছে ব্যাপক চৰ্চাৰ বিষয়। ইফালে সাক্ষাৎকাৰটোত কাৰ্তিকক কেনেধৰণৰ যুৱতীক বিয়া কৰাব বুলি প্ৰশ্ন কৰা হয় ৷ উত্তৰত কাৰ্তিকে কয় যে তেওঁ দীপিকাৰ পাডুকনৰ দৰে যুৱতীক বিয়া কৰাব বিচাৰে । কাৰণ দীপিকাই স্বামী ৰনৱীৰ সিঙক লৈ সততে গৰ্বিত অনুভৱ কৰে।
দৰাচলতে দীপিকা পাডুকনে যিকোনো সাক্ষাৎকাৰত স্বামী ৰনৱীৰ সিঙৰ প্ৰসংগ উল্লেখ কৰি তেওঁলোকৰ প্ৰেম, ভালপোৱা, সম্পৰ্কৰ বিষয়ে মত প্ৰকাশ কৰে । আনহাতে, কাৰ্তিক আয়ান আৰু কিয়াৰা আডৱানীৰ অভিনীত “ভুল ভুলেইয়াঁ ২”ৰ নিৰ্মাতাই জনাই যে কৰ’না ভাইৰাছৰ প্ৰতিৰোধৰ কাৰণে দিয়া তলাবন্ধৰ কাৰণে সম্প্ৰতি দৃশ্যগ্ৰহণ পিছুৱাই দিয়া হ’ব ৷ কাৰণ ভাৰতত প্ৰতিদিনে বৃদ্ধি পাইছে কৰ’না ভাইৰাছত আক্ৰান্তৰ সংখ্যা । গতিকে এনে পৰিস্থিতিত দৃশ্যগ্ৰহণ কৰা সম্ভৱ নহয় । “ভুল ভুলেইয়াঁ ২”ৰ অধিকাংশ দৃশ্যগ্ৰহণ লক্ষ্ণৌত কৰা হ’ব। ইতিমধ্যে ছবিখনৰ কিছু দৃশ্যগ্ৰহণ লক্ষ্ণৌত কৰা হ’ল ৷ কিন্তু এনেধৰণৰ পৰিস্থিতিত পুনৰ লক্ষ্ণৌ যোৱাতো সুৰক্ষিত নহয়। গতিকে প্ৰথমতে মুম্বাইত দৃশ্য গ্ৰহণ কৰাৰ পিছত বাকী দৃশ্যগ্ৰহণ ক’ত হ’ব সেয়া পৰৱৰ্তী সময়তহে সিদ্ধান্ত কৰিব বুলি জনায় ছবিখনৰ নিৰ্মাতা মুৰাদ খোতানীয়ে।