দুবেলা দুমুঠি অন্ন যোগাৰ কৰাটো এতিয়া বিশ্বৰ বহু লোকৰ বাবে হৈ পৰিব এক দুখৰ বিষয়। আফ্ৰিকাৰ দৰিদ্ৰ দেশৰ পৰা আৰম্ভ কৰি ভাৰতৰ দৰে উন্নয়নশীল দেশৰ কথা বাদেই, তথাকথিত ধনী দেশসমূহতো যদি খাদ্য যোগাৰ কৰিব নোৱাৰি নাগৰিকৰ প্ৰাণ যোৱাৰ অৱস্থা হয় তেন্তে আচৰিত হ’বলগীয়া একো নাথাকিব। কিয়নো বিশ্ব আজি এক বৃহৎ খাদ্য সংকটৰ দুৱাৰডলিত থিয় দিছে। এই সংকট ইমান গভীৰ যে সেয়া কমেও বিগত ৫০ বছৰত কোনেও দেখা নাই। এই সতৰ্কবাণী শুনাইছে ৰাষ্ট্ৰসংঘই। ৰাষ্ট্ৰসংঘৰ মূৰব্বী এণ্টনীঅ’ গুটেৰেছে সতৰ্ক কৰি দি কৈছে যে কৰ’নাৰ পৰিপ্ৰেক্ষিতত বিগত ৫০ বছৰৰ ভিতৰত সৰ্বাধিক ভয়াৱহ খাদ্য সংকটৰ সৃষ্টি হ’ব বিশ্বজুৰি ।
ৰাষ্ট্রসমূহ যদি এতিয়াৰ পৰা সাৱধান নহয়, তেন্তে অধিক ভয়াবহ দিন সমাগত। ৰাষ্ট্ৰসংঘই দুৰ্যোগ আঁতৰাবলৈ চৰকাৰক খৰতকীয়াকৈ কাম কৰিবলৈ কৈছে। ‘তাৎক্ষণিক ব্যৱস্থা লোৱা নহয়, তেন্তে ক্ৰমাগতভাৱে এই কথা স্পষ্ট হৈছে যে বিশ্বজুৰি জৰুৰীকালীন খাদ্য ব্যৱস্থাৰ সৃষ্টি হ’ব, যাৰ দীঘলীয়া প্ৰভাৱ পৰিব লাখ লাখ শিশু আৰু প্ৰাপ্তবয়স্কৰ ওপৰত।’ এইদৰে কয় ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে। তেওঁ কয় যে দৰিদ্ৰ লোকৰ বাবে উত্তম সামাজিক সুৰক্ষাৰ জৰুৰীকালীন প্ৰয়োজন আছে কিয়নো কৰ’না ভাইৰাছৰ লগে লগে মন্দাৱস্থাৰ কলা ছাঁয়ে আগুৰি ধৰিছে। ফলত সাধাৰণ পৰিপুষ্টিৰ লাভ কৰাটো দৰিদ্ৰ লোকৰ হাতৰ বাহিৰৰ বিষয় হৈ পৰিব বুলি ৰাষ্ট্ৰসংঘৰ সচিব প্ৰধানে উদ্বেগ ব্যক্ত কৰে। তেওঁ কয়, আমি এই বিশ্ব মহামাৰীৰ নিয়ন্ত্ৰণৰ বাবে চলোৱা আমাৰ প্ৰচেষ্টাৰ শোচনীয় প্ৰভাৱ পৰিহাৰ কৰিবলৈ এতিয়াই সক্ৰিয় হ’ব লাগিব।’
কৰ’না পৰিস্থিতিৰ ভয়াবহতাৰ ফলত বিশ্বত মুঠ জনসংখ্যাৰ অন্ততঃ ১০ শতাংশই অতি সোনকালে নিজ খাদ্য সুৰক্ষা হেৰুৱাব। সময়ৰ লগে লগে এই সংখ্যা বৃদ্ধি পাব। তলাবন্ধই নিশ্চিতভাৱে খাদ্য আবন্টন ব্যৱস্থাত বৃহৎ আঘাত শোধাইছে। ইয়াত কোনো সন্দেহ নাই। পৰিবহণ ব্যৱস্থা বন্ধ হৈ থকাত খেতি পথাৰতে নষ্ট হৈছে উৎপাদিত শস্য। মানুহৰ ঘৰলৈ সেই শস্য নিব পৰা নাই। ইয়াৰ ফলত মূল্যবৃদ্ধি হৈছে। বিশ্বৰ প্ৰায় পাঁচ কোটি অৰ্থাৎ ৪.৯ কোটি মানুহ এই তালিকাত অন্তৰ্ভুক্ত হৈছে। অতি দুখৰ বিষয় যে ২০ শতাংশ শিশু থাকিব লাগিব অনাহাৰে। সচিব প্ৰধানৰ মতে ইয়াৰ পূৰ্বৰ বিভিন্ন মহামাৰী উদ্ভৱ পৰিস্থিতিৰ পৰা শিক্ষা লৈ এইবাৰো খাদ্য সংকট আৰু অন্যান্য সমস্যাৰ স’তে যুজঁ কৰি দেশ আগুৱাই যাব লাগিব। অৱশ্যে এইবাৰৰ সমস্যা আনবাৰতকৈ কিছু কঠিন।