কৰ’নাক পৰাজিত কৰাৰ ক্ষেত্ৰত এক ব্যতিক্ৰম হিচাপে চৰ্চালৈ আহিছে এজন মাৰ্কিন নাগৰিক। সত্তৰোৰ্ধ্ব এইজন মাৰ্কিন নাগৰিকে কৰ’নাক পৰাজিত কৰিবলৈ দুমাহ হাস্পতালত থাকিবলগীয়া হয়; কিন্ত অভিলেখ সৃষ্টি কৰে হাস্পতাল কৰ্তৃপক্ষক দিবলগীয়া হোৱা বিলখনে । বিলৰ ধনৰাশি শুনিলে যিকোনো লোকৰে চকু কপালত উঠিব । মাৰ্কিন যুক্তৰাষ্ট্ৰৰ ৱাছিংটনৰ ইচাকাওয়া চহৰত বাস কৰে মাইকেল ফ্লোৰ নামৰ এই লোকজনে । কৰ’নাত আক্ৰান্ত হোৱাৰ পাছত যোৱা চাৰি মাৰ্চত ভৰ্তি হয় স্থানীয় চিকিৎসা কেন্দ্ৰত । ফ্লোৰৰ দৰে বয়সৰ লোকৰ ক্ষেত্ৰত সাধাৰণতে হোৱাৰ নিচিনাকৈ ইমান সহজতে পৰাজিত কৰিবলৈ সক্ষম হোৱা নাছিল কৰ’নাক । এদিন-দুদিন অথবা এসপ্তাহ -দুসপ্তাহ নহয়, সুদীৰ্ঘ ৬২দিন চিকিৎসা কেন্দ্ৰত ফ্লোৰে চিকিৎসাধীন হৈ থাকিবলগীয়া হৈছিল কৰ’নাৰ পৰা উপশম পাবলৈ । ইমান দীর্ঘদিনলৈ হাস্পতালত থাকি নিশ্চিতভাৱেই অভিলেখ গঢ়ে ফ্লোৰে ।
সম্প্ৰতি কৰ’নাৰ পৰা উপশম লাভ কৰিবলৈ কোনো লোকেই ইমান দীঘলীয়াকৈ চিকিৎসাধীন হৈ থকাৰ কোনো তথ্য প্ৰকাশ পোৱা নাই । কিন্তু ইয়াৰ বাবে ফ্লোৰৰ চিকিৎসা ব্যয়ৰ বিল হয়গৈ মুঠ ১১ লাখ ২০ হেজাৰ মাৰ্কিন ডলাৰ । ভাৰতীয় মুদ্ৰাৰ হিচাপত আঠ কোটি ৬১লাখ ৩৯ হেজাৰ টকা । চিকিৎসালয় কৰ্তৃপক্ষৰ পৰা ফ্লোৰৰ আত্মীয়ৰ হাতত তুলি দিয়া বিলখনক লৈ স্বাভাৱিকতে আৰম্ভ হৈছে চর্চা । ফ্লোৰক চিকিৎসালয়ৰ পৰা ঘৰলৈ যাবলৈ দিয়াৰ সময়ত দিয়া বিলখনৰ ধনৰাশি যিমান ডাঙৰ আছিল সিমানেই ডাঙৰ আছিল ইয়াৰ আকাৰো।বিলখনত মূল পৃষ্ঠা হৈছে ১৮১টা । বিলখনত মুঠতে তিনি হেজাৰটা দফা সংলগ্ন কৰা হৈছে । ইয়াৰ ভিতৰত বিশেষভাৱে উল্লেখ হৈছিল ভেন্টিলেটৰসহ কিছু সংশ্লিষ্ট সামগ্ৰীৰ হিচাপ । এটা সময়ত কৰ’না আক্ৰান্ত ফ্লোৰৰ হৃদযন্ত্ৰ , বৃক্ক , হাওঁফাওঁ আদি প্ৰায় সম্পূৰ্ণভাৱে বিকল হৈ পৰিছিল । তেনে এক অৱস্থাৰ পৰা ৰোগীক ওভতাই অনাটো বৃহৎ প্ৰত্যাহ্বান হিচাপে দেখা দিছিল । বিলৰ অংকই সকলোৰে চকু কপালত তুলিলেও কিন্ত মাইকেল ফ্লোৰ বৰ্তমান সুস্থ।