দেশৰ পাঁচশ বছৰীয়া প্ৰতীক্ষাৰ অন্তত আজি অযোধ্যাত ৰাম মন্দিৰ নিৰ্মাণক লৈ ব্যাপক প্ৰস্তুতি আৰম্ভ হৈছে ৷ দেশৰ প্ৰধানমন্ত্ৰী নৰেন্দ্ৰ মোদীয়ে ভূমি পূজন আৰম্ভ কৰিছে ৷ ইয়াকে লৈ দেশবাসী জনসাধৰণে যথেষ্ট উৎসাহী হোৱা দেখা গৈছে ৷ ইয়াৰ ব্যতিক্ৰম নহয় গুৱাহাটী মহানগৰী ৷ আজি মধ্য গুৱাহাটী উন্নয়ন সমিতিয়ে ৰাম মন্দিৰ নিৰ্মাণৰ ভূমি পূজাক লৈ পল্টনবজাৰত এক পূজা-অৰ্চনাৰ অনুষ্ঠানৰ আয়োজন কৰে ৷
পূজা অনুষ্ঠানত প্ৰাক্তন সাংসদ ৰমেন ডেকা, মধ্য গুৱাহাটী উন্নয়ন সমিতিৰ সাধাৰণ সম্পাদক ৰাজীৱ দাস উপস্থিত থাকে ৷ এই সন্দৰ্ভত ৰমেন ডেকাই কয়, ভগৱান ৰামচন্দ্ৰই সমগ্ৰ দেশবাসীৰ মাজত শান্তি- সম্প্ৰতি কঢ়িয়াই আনিব । উল্লেখ্য যে পল্টনবজাৰ বিভিন্ন স্তৰৰ প্ৰায় শতাধিক ভক্তপ্ৰাণ ৰাইজে পূজাস্হলীত উপস্থিত থাকি দেশৰ মংগলৰ কাৰণে ভগৱান ৰামচন্দ্ৰৰ ওচৰত আশীৰ্বাদ লয় ৷
সন্ধিয়া মধ্য গুৱাহাটী উন্নয়ন সমিতিৰ তৰফৰ পৰা কে’বা শতাধিক বন্তি প্ৰজ্বলন কৰা হ’ব বুলি সাধৰণ সম্পাদক ৰাজীৱ দাসে জনাই ৷ একেদৰে অযোধ্যাৰ ভূমি পূজনক লৈ বিশ্ব হিন্দু পৰিষদ মহানগৰ সমিতিৰ উদ্যোগতো মহানগৰীৰ ভিন্ন প্ৰান্তত লাল গণেশ , হেঙেৰাবাৰী, খানাপাৰা, পাথৰকুৱেৰী, বামুণী মৈদামকে ধৰি ভিন্ন প্ৰান্তত হোমযজ্ঞ অনুষ্ঠিত কৰা হয়।