চিৰাঙৰ চিদলী ধলাগাঁও ৰাজাযানৰ দৰিদ্ৰ শ্ৰমজীৱি এজন যুৱকৰ শিল্পীসত্বাৰ প্ৰশংসা বিভিন্ন জনৰ । দৰিদ্ৰতাইয়ো ৰখাব নোৱাৰিলে শিল্পীসত্তাক । গাঁওখনৰ শিক্ষিত শ্ৰমজীৱি যুৱক নবিন বৰ্মনৰ শিল্পকলা পোহৰলৈ আহে । সৰুৰে পৰা শিল্পীসুলভ মনোভাৱ থকা নবিন বৰ্মনে তলাবন্ধৰ এই সময়ছোৱাত ধুমুহাত ওফৰি পৰা বাঁহৰ মূঢ়াৰে তৈয়াৰ কৰি উলিয়াইছে এজনৰ পিচত আনজন মহান শিল্পীৰ প্ৰতিমূৰ্তি ।
শংকৰদেৱৰ পৰা আৰম্ভ কৰি ভাৰত ৰত্ন ভূপেন হাজৰিকা, জয়ন্ত হাজৰিকা, খগেন মহন্ত, লতা মঙ্গেশকাৰ, জয়ন্ত হাজৰিকা, জুবিন গাৰ্গ, বিশ্ব বিখ্যাত অসমৰ এশিঙীয়া গঁড়, ঘৰিয়াল, ধনেশ পক্ষী, ৰাজ হাঁহ আদি । বাঁহৰ মূঢ়া আৰু এমছিল ব্যৱহাৰ কৰি ওলিয়াইছে সুন্দৰ সুন্দৰ প্ৰতিমূৰ্তি ।
দিনৰ ভাগত বঙাইগাঁও শোধনাগাৰত এজন পেইন্টাৰ হিচাপে হাজিৰা কৰি সন্ধিয়া ঘৰত আহি বাঁহৰ মূঢ়া, দা-কটাৰি লৈ কামত লাগে । তৈয়াৰ কৰি তুলে সুন্দৰ সুন্দৰ একো একোজন মহান শিল্পীৰ প্ৰতিমূৰ্তি । দিন হাজিৰা কৰি পৰিয়াল পোহপাল দিয়া যুৱক জনৰ এই কামক পৰিয়ালৰ লোকে সহায় কৰাৰ পৰিৱৰ্তে সময় নষ্ট কৰি এই সমূহ কাম কৰাৰ বাবে বাধা দিয়াৰ কথাও জনায় যুৱকজনে । ইয়াৰ পৰা কোনো আয় নহয় ।
এতিয়ালৈ বহু কেইটা প্ৰতিমূৰ্তি সাজি উলিয়াইছে যদিও এটাও বিক্ৰী কৰা নাই আৰু সেয়ে এতিয়া পৰিয়ালৰ হাঁহ নচৰা অৱস্থা । ভাল মূল্য পালে বিক্ৰী কৰাৰ কথাও জনায় যুৱশিল্পীজনে । এতিয়া ঘৰত থোৱাৰ ঠাইৰ অভাৱত এতিয়া এই শিল্প কলা স্তিমিত হোৱাৰ পথত । চৰকাৰৰ সাংস্কৃতিক বিভাগৰ পৰা শিল্পী জনে আৰ্থিক সহায় পালে হয়তো আগলৈ অধিক মনোবলেৰে আগবাঢ়ি যাব পাৰিব । এই দৰেই সাংবাদিকক জানিবলৈ দিয়ে যুৱশিল্পী নবিন বৰ্মনে ।
আনহাতে, পৰিয়ালৰ আৰ্থিক অনাটনৰ বাবে হাইস্কুল শিক্ষান্ত পৰীক্ষাত উত্তীৰ্ণ হৈয়ে পঢ়া-শুনা এৰিব লগীয়া হৈছিল । তাৰ পিচতে দৰিদ্ৰ পৰিয়ালটিৰ আৰ্থিক দিশত সহায়ৰ বাবে কামত লাগে নবিন বৰ্মনে । বৰ্তমান তেওঁৰ পত্নী আৰু এটা পুত্ৰ, ককায়েক, ভনীয়েক আৰু মাকৰ সৈতে থাকে। পৰিয়ালত নাই কাৰোৰে চাকৰি ।
ককায়েকে কৃষি কৰ্মত জড়িত যদিও নবিন বৰ্মন ৰং তুলিকাৰ সৈতে দিন হাজিৰা কৰি জীৱিকা অৰ্জন কৰিছে । সেয়ে নিজৰ শিল্পী সত্তাক অধিক মনোগ্ৰাহি কৰাৰ বাবে চৰকাৰৰ সহায় বিচাৰি আবেদন জনাইছে । ইয়াৰোপৰি স্থানীয় লোক সকলে নবিনক লৈ গৌৰৱ কৰি কয় যে চৰকাৰে এইজন যুৱ শিল্পীক সহায় কৰিলে নিশ্চয়কৈ তেওঁৰ উদ্যমী শিল্পী সত্তাৰে নিজৰ অঞ্চলৰ লগতে দেশৰ সুনাম কঢ়িয়াবলৈ সক্ষম হব।