গুৱাহাটীৰ শিলপুখুৰী নিৱাসী বিশিষ্ট নাগৰিক তথা বি বৰুৱা মহাবিদ্যালয়ৰ অসমীয়া বিভাগৰ প্ৰাক্তন অধ্যাপক, অসম কেশৰী অম্বিকাগিৰী ৰায়চৌধুৰীৰ পুত্ৰ ভগগিৰী ৰায়চৌধুৰীৰ আজি গুৱাহাটীৰ শিলপুখুৰীৰ নিজা বাসভৱনত বাৰ্ধক্যজনিত কাৰণত পৰলোকপ্ৰাপ্তি ঘটে । ১৯৩৩ চনত জন্মলাভ কৰা ৰায়চৌধুৰীৰ মৃত্যুৰ সময়ত বয়স আছিল ৮৭ বছৰ ।
এগৰাকী বিশিষ্ট কবি, নিবন্ধকাৰ তথা বিভিন্ন কাকতৰ স্তম্ভলেখক হিচাপেও জনাজাত ৰায়চৌধুৰীয়ে মন, মাটি , মেঘ, ৰ’দৰ ৰূপালী ৰেখা, আয়ুস্মতী আদি কবিতা পুথি, শিশু উপন্যাস মৰণ বিজয়ীকে ধৰি কে’বাখনো গ্ৰন্থ ৰচনা কৰি থৈ গৈছে । মৃত্যুৰ কিছুদিনৰ আগলৈকে তেখেতে এখন সাপ্তাহিক কাকতত ধাৰাবাহিকভাৱে “মোৰ জীৱনৰ উৰ্মিমালা” শীৰ্ষক আত্মজীৱনী লিখি আছিল।
উল্লেখযোগ্য যে নিচেই কম বয়সতে বায়েক শুচিব্ৰতা ৰায়চৌধুৰীৰ সৈতে ‘শুভ-ৰায়’ ছদ্মনামত অনুবাদ কৰা ‘সোণালী পেৰা’ গ্ৰন্থখনেই আছিল অম্বিকাগিৰী ৰায়চৌধুৰীয়ে প্ৰতিষ্ঠা কৰা প্ৰকাশন প্ৰতিষ্ঠান “আত্মবিকাশ ভৱন”ৰ পৰা প্ৰকাশিত প্ৰথমখন কিতাপ ।
প্ৰয়াত ৰায় চৌধুৰী অসম সেৱক প্ৰতিষ্ঠানকে ধৰি অসম যুৱক সমাজ, অম্বিকাগিৰী সমাজ মণ্ডলী, যুৱ নিৱাস সন্থা, অম্বিকাগিৰী স্মাৰক ন্যাস আৰু বিভিন্ন সমাজসেৱামূলক অনুষ্ঠানৰ স’তে ওতঃপ্ৰোতভাৱে জড়িত আছিল । বিশিষ্ট অসমপ্ৰেমী ৰূপে জনাজাত ৰায়চৌধুৰীয়ে অসম আন্দোলনতো সক্ৰিয় ভাৱে অংশগ্ৰহণ কৰিছিল ।
উল্লেখযোগ্য যে তেওঁ পত্নী ঋতুৰাণী ৰায়চৌধুৰীৰ ১৯৯২ চনতে পৰলোকপ্ৰাপ্তি ঘটিছিল । আজি নৱগ্ৰহ শ্মশানত তেখেতৰ শেষকৃত্য সম্পন্ন কৰা হয়।