অসম চৰকাৰৰ নিৰ্দেশনা অনুসৰি আজি চিৰাং জিলা উপায়ুক্ত তথা জিলা দুৰ্যোগ প্ৰশমন বিভাগৰ সভাপতি গৌতম তালুকদাৰে আজি এক কঠোৰ নিৰ্দেশনা জাৰি কৰিছে । নিৰ্দেশনাটোত জিলাখনৰ সকলো লোকে ৰাজহুৱা স্থানত মাস্ক পৰিধান কৰাটো বাধ্যতামূলক কৰিছে । ৰাজহুৱা স্থান যেনে- বজাৰ ,পথ-পদপথ, চিকিৎসালয়, সকলো ধৰণৰ কাৰ্যালয় আদিত সকলো লোকেই মুখত মাস্ক পৰিধান কৰাটো বাধ্যতামূলক কৰিছে ।
মহামাৰী ক’ভিড সংক্ৰমণ প্ৰতিৰোধ কৰাৰ বাবেই অসম ক’ভিড-১৯ নিয়ন্ত্ৰণৰ নিৰ্দেশনা অনুসৰি জিলা প্ৰশাসনে এই নিৰ্দেশনা জাৰি কৰিছে । জিলা উপায়ুক্তৰ নিৰ্দেশনাটোত কঠোৰ ভাৱে কোৱা হৈছে কোনো লোকেই কোনো সভা সমিতি তথা ৰাজহুৱা স্থান বা যান-বাহনত চলাচল কৰোতে বাধ্যতামূলকভাৱে মাস্ক পৰিধান কৰিব লাগিব ।
নিৰ্দেশনা অমান্য কৰি কোনো লোকে মাস্ক পৰিধান নকৰিলে ভাৰতীয় দণ্ডবিধিৰ ১৮৮ ধাৰা অনুসৰি শাস্তিৰ সন্মুখীন হ’ব লাগিব । মাস্ক পৰিধান নকৰা লোকে প্ৰথম বাৰ ৫০০ টকাৰ জৰিমনা ভৰিব লাগিব । দ্বিতীয় আৰু চতুৰ্থবাৰ অমান্য কৰা সকলে জৰিমনা হিচাপে এহেজাৰ টকা দিব লাগিব । সেয়ে জিলা উপায়ুক্তই নিৰ্দেশনাটোত সকলো লোককে ক’ভিড সংক্ৰমণ প্ৰতিৰোধৰ বাবে মাস্ক পিন্ধি সামাজিক দূৰত্ব মানি চলাৰ বাবে অনুৰোধ জনাইছে ।