মানৱতাক চৰম ভ্ৰুকুটি দেখুৱাই এচাম পাষাণ হৃদয়ৰ ব্যক্তিয়ে নিজকে দানৱৰ ৰূপ দিয়াৰ ঘটনা সংঘটিত হৈছে কাৰ্বি আংলঙৰ বোকাজানত ৷ আজি বোকাজানৰ ইকৰাণি বস্তিত এগৰাকী মহিলাই পথাৰত গৰু এৰাল দিবলৈ গৈ থকা অৱস্থাত পথৰ কাষৰ হাবিত শিশুৰ কান্দোন শুনিবলৈ পায় ৷
মহিলা গৰাকীয়ে হাবিখনৰ মাজলৈ সোমাই প্ৰত্যক্ষ কৰে যে এটি সদ্যজাত কন্যা সন্তান হাবিৰ মাজত পৰি আছে ৷ শিশুটোৰ গোটেই দেহা গুৰি পৰুৱাই আগুৰি থকাত যন্ত্ৰণাত শিশুটোৱে কান্দি আছিল ৷
শিশুটোক মহিলাগৰাকীয়ে হাবিৰ পৰা উঠাই আনি গাঁৱৰ মহিলাসকলৰ সহযোগত পৰিষ্কাৰ কৰাৰ লগতে কেবাগৰাকী মহিলাই নিজৰ দুগ্ধ পান কৰাই মানৱতাৰ পৰিচয় দিয়ে ৷ পাছত শিশুটোক বোকাজান আৰক্ষীয়ে উদ্ধাৰ কৰি যাৱতীয় ব্যৱস্থা গ্ৰহণৰ যো-জা চলাইছে ৷