হাৰিয়ানাকে ধৰি পঞ্জাৱ আৰু দেশৰ কে’বাখনো ৰাজ্যত নতুন কৃষি বিধেয়কৰ বিৰোধিতাৰে কৃষকসকলে অব্যাহত ৰাখিছে প্ৰতিবাদ । ৰাজপথ আৰু ৰেলপথসমূহ বন্ধ কৰি প্ৰতিবাদ সাব্যস্ত কৰিছে কৃষকসকলে । হাজাৰ হাজাৰ কৃষকে কৃষি বিধেয়কৰ বিৰোধিতাৰে উগ্ৰ বিৰোধ প্ৰদৰ্শনৰ আৰম্ভ কৰাৰ বাবে সম্প্ৰতি অতিৰিক্ত আৰক্ষীক মোতায়ন কৰা হৈছে । লগতে ৰাজ্যৰ কিছু কিছু সীমাৰ অঞ্চল ছিল কৰি দিয়া হৈছে ।
আনহাতে, এই বিধেয়ক বাতিল নকৰা পর্যন্ত তেওঁলোকৰ আন্দোলন তীব্রতৰ হৈ থাকিব বুলি হুংকাৰ দিছে কৃষকসকলে । কংগ্ৰেছ, আৰজেডি আৰু তৃণমূলৰ দৰে বিৰোধী দলৰ লগতে ১০ কেন্দ্ৰীয় ট্ৰেড ইউনিয়নে কৃষকসকলক সমৰ্থন কৰি মাত মাতিছে ।
চাওঁ আহক নতুন কৃষি বিধেয়কৰ সন্দৰ্ভত কেইটামান শেহতীয়া তথ্য-
■আজি বিজেপি নেতাসকলৰ মাজত অনুষ্ঠিত হোৱা ভাৰ্চুৱেল বৈঠকত প্ৰধানমন্ত্ৰী নৰেন্দ্ৰ মোদীয়ে কয় যে, ‘বিজেপি নেতৃত্বাধীন এনডিএ চৰকাৰে ইতিহাসৰ সৃষ্টি কৰিছে । এই সংশোধিত বিধেয়কখনৰ দ্বাৰা কৃষকসকল লাভৱান হ’ব’ । লগতে কয় যে, ‘যিসকলে কৃষকসকলক মিছা কৈছে তেওঁলোকে কৃষকসকলৰ কান্ধত বন্দুক থৈ গুলি মাৰিছে’ ।
■ প্ৰধানমন্ত্ৰীয়ে আশ্বাস দিয়া সত্বেও সমগ্র দেশজুৰি আন্দোলন তীব্রতৰ হৈ উঠিছে । প্ৰধানকৈ পাঞ্জাৱ আৰু হাৰিয়ানাকে ধৰি উত্তৰ প্ৰদেশ, মধ্য প্ৰদেশ, বিহাৰ আৰু কৰ্ণাটকত ব্যাপক ৰূপত আন্দোলন আৰম্ভ হৈছে ।
■ ভাৰতীয় কিষান ইউনিয়ন বেনাৰৰ অন্তৰ্গত ৩১ টা কৃষকৰৰ সমূহে পঞ্জাৱত সম্পূৰ্ণ বন্ধৰ আহ্বান জনাইছে ।
■ অমৃতসৰ আৰু ফিৰোজপুৰ জিলাত বৃহস্পতিবাৰে কৃষকসকলে ৰেলৰ ট্ৰেকত বহি প্ৰতিবাদ সাব্যস্ত কৰে । যাৰ ফলস্বৰূপে সেই স্থানত যান বাহনৰ সমস্যাই দেখা দিছে । ইয়াৰ কাৰণে ৰেল বিভাগে ফিৰোজপুৰৰ সকলো ৰেলসেৱা বাতিল কৰে ।
■ কংগ্ৰেছৰ নেত্ৰী ছোনিয়া গান্ধীয়ে নতুন কৃষি বিধেয়কৰ সন্দৰ্ভত আজি পুনৰ টুইট কৰি কয় যে, ‘নতুন কৃষি বিধেয়কখনে আমাৰ কৃষকসকলক গোলাম বনাব ।’