ঋণগ্রস্তলৈ বৃহৎ সকাহ কঢ়িয়াই কেন্দ্রীয় চৰকাৰে উচ্চতম ন্যায়ালয়ক জনায় যে দুই কোটি পর্যন্ত ঋণ আদায়ৰ ক্ষেত্ৰত সুতৰ ওপৰত সুত ৰেহাই দিবলৈ সাজু কেন্দ্র । মধ্যমীয়া, ক্ষুদ্র আৰু অতিক্ষুদ্র (এম এছ এম ই) উদ্যোগে গ্ৰহণ কৰা ঋণৰ ক্ষেত্ৰত এই সুত ৰেহাই দিয়া হ’ব । শৈক্ষিক, গৃহ নির্মাণ, উপভােক্তা সামগ্রী, গাড়ীৰ ঋণ আদিৰ ক্ষেত্ৰত এই সুতৰ ৰেহাই দিয়া হ’ব । ইয়াৰ দ্বাৰা মধ্যমীয়া, ক্ষুদ্র আৰু কুটিৰ উদ্যোগলৈ আহিল বৃহৎ সকাহৰ বতৰা । তলাবন্ধৰ সময়ত ঋণ আদায়ৰ স্থগিতকৰণ (মৰেটৰিয়াম)ৰ সময়ছােৱাত দুই কোটি টকা পর্যন্ত ঋণৰ ক্ষেত্ৰত কিস্তিৰ ওপৰত অতিৰিক্ত কোনাে সুত আদায় দিব নালাগে ঋণগ্রস্তই । এই অতিৰিক্ত ব্যয় বহন কৰিব কেন্দ্রই ।
‘অতিমাৰীৰ সময়ত চৰকাৰৰ বাবে একমাত্র সিদ্ধান্ত হৈছে ঋণ ৰেহাইৰ বােজা বহন কৰাটো ।’ এক শপতনামাত চৰকাৰে এইদৰে কয়। বিত্ত মন্ত্রণালয়ৰ মতে ইয়াৰ ফলত বেংকৰ ওপৰত বৃহৎ বােজা পৰিব । তলাবন্ধৰ সময়ত ছমাহৰ বাবে ঝণৰ কিস্তি স্থগিত ৰখাৰ সিদ্ধান্ত লৈছিল কেন্দ্রই । এই মর্মে কিস্তি স্থগিত কৰি দিয়ে বহু বেংকে, কিন্তু কিছুদিন পূর্বে আদালতত এক গােচৰ ৰুজু কৰা হয় আৰু অভিযােগ কৰা হয় যে ছমহীয়া কিস্তিত সুতৰ ওপৰত সুত আদায় বিচাৰিছে বেংকে ।
ইয়াকে লৈ আদালতে বেংক আৰু কেন্দ্রক কঠোৰভাৱে প্রশ্ন কৰে, আনকি তিৰস্কাৰাে কৰে । বেংকসমূহে কয় যে, এই বিশাল পৰিমাণৰ কিস্তিৰ সুত ৰেহাই সম্ভৱ নহয় তেওঁলােকৰ পক্ষে । কেন্দ্রক সমস্যা সমাধানৰ নির্দেশ দিয়ে সর্বোচ্চ আদালতে। আৰম্ভণিতে কেন্দ্রই ৰেহাই সম্ভৱ নহ’ব বুলি কৈছিল । ইয়াৰ পাছত প্রাক্তন মহাগাণনিক (কেগ) ৰাজীৱ মেহৰিদিৰ নেতৃত্বৰ পেনেলৰ পৰামর্শ মতে চৰকাৰে স্থিতি সলনি কৰে ।