কামৰূপ জিলাৰ বকো আৰক্ষী থানাৰ অন্তৰ্গত ১৭নং ৰাষ্ট্ৰীয় ঘাইপথৰ বন্দাপাৰাত সন্ধিয়া সংঘটিত এক ভয়াবহ পথ দুৰ্ঘটনাত থিতাতে তিনিজন লোকৰ মৃত্যু হয়। আনহাতে ৯জন যাত্ৰী গুৰুতৰ ভাৱে আহত হয় । বাইক আৰোহীৰে যাত্ৰীবাহী ট্ৰেভেলাৰৰ সংঘৰ্ষত তিনিজন লোকৰ থিতাতে মৃত্যু হয় । আঘাতপ্ৰাপ্ত হয় প্ৰায় ৯জন যাত্ৰী। বাইক আৰোহী যুৱকদ্বয়ৰ লগতে ট্ৰেভেলাৰৰ যাত্ৰী এজন নিহত হয়। নিহত কেইজনৰ দুজন হৈছে অজয় ৰাভা(২২), উদ্ধৱ চৌধুৰী(৪৮) ।
বাইক-ট্ৰেভেলাৰৰ সংঘৰ্ষৰ পিছতে ট্ৰেভেলাৰখন বাগৰি পৰে পথৰ দাঁতিত। ইয়াৰ ফলত ট্ৰেভেলাৰত বহুসময় আৱদ্ধ হৈ থাকে এটা মৃতদেহ । দুৰ্ঘটনাত পতিত যাত্ৰীবাহী ট্ৰেভেলাৰখনৰ নম্বৰ AS01 EC 0705। এই পৰ্যন্ত বাইকখনৰ নম্বৰ লাভ কৰা নাই । আনহাতে, ঘটনাস্থলীত বকো আৰক্ষী হোৱাৰ পিছতে নিহত আৰু আহত কেইজনক বকো প্ৰাথমিক স্বাস্থ্য কেন্দ্ৰত ভৰ্তি কৰায় ।
প্ৰাপ্ত তথ্য মতে, ট্ৰেভেলাৰখন নগৰবেৰাৰ চিমিলিতলালৈ যোৱাৰ পথত আছিল । নিহত অজয় ৰাভাৰ ঘৰ বকোৰ বন্দাপাৰাত আৰু ধূপধৰাত চাৰ্ভিচিং চেণ্টাৰত কৰ্মৰত আছিল। কৰ্তব্য সমাপন কৰি নিজ গৃহলৈ মটৰ চাইকেলেৰে উভতি যোৱা পথতে দুৰ্ঘটনাত নিহত হয় অজয় ।
আনহাতে উদ্ধৱ চৌধুৰীৰ ঘৰ নগৰবেৰাৰ পথালিপাৰাত। নিহত উদ্ধৱ চৌধুৰী নগৰবেৰা চক্ৰত বিষয়া কাৰ্যালয়ত মণ্ডল হিচাপে কৰ্মৰত আছিল ।
