সমগ্ৰ দেশতে আনল’ক প্ৰক্ৰিয়াৰ জৰিয়তে ইতিমধ্যে আন্তঃৰাজ্যিক যাতায়াতৰ ক্ষেত্ৰত থকা নিষেধাজ্ঞা উঠাই লোৱা হৈছে যদিও মেঘালয় চৰকাৰে অসমৰ সকলো ধৰণৰ যানবাহন মেঘালয়ত প্ৰৱেশৰ ক্ষেত্ৰত এতিয়াও বাধা নিষেধ আৰোপ কৰিছে ৷
ফলত গোৱালপাৰা জিলাৰ দুধনৈ, কৃষ্ণাই, দৰংগিৰি, ধূপধৰা, আগিয়া, লক্ষীপুৰ তথা অসম মেঘালয় সীমান্তৱর্তী পথেৰে অহা-যোৱা কৰা যাত্ৰীবাহী বাছ, মালবাহী ট্ৰাক, উইংগাৰ, টেক্সি, অট’ৰ উপৰিও ব্যৱসায়ী সকলে যথেষ্ট সমস্যাৰ সন্মুখীন হৈছে ৷ মেঘালয় চৰকাৰৰ যাতায়াতৰ ক্ষেত্ৰত এই বাধা আৰোপৰ ব্যৱস্থাত জাঙুৰ খাই উঠিছে গোৱালপাৰা জিলাৰ ৪০ টাকৈ সংগঠন ।
এই সন্দৰ্ভত কৃষ্ণাই আঞ্চলিক মটৰ শ্ৰমিক সন্থাৰ কাৰ্যালয়ত আজি এক সংবাদ মেলৰ আয়োজন কৰে সংগঠনসমূহে ৷ গোৱালপাৰা জিলা ছাত্ৰ সন্থাৰ নেতৃত্বত আয়োজিত আজিৰ সংবাদ মেলত জিলাখনৰ চল্লিশটাকৈ সংগঠন একত্ৰিত হৈ মেঘালয় চৰকাৰ-প্ৰশাসনক আগন্তুক এসপ্তাহৰ ভিতৰত আন্তঃৰাজ্যিক যাতায়াত সমস্যাৰ সমাধান কৰিবলৈ আহ্বান জনায় ৷ অন্যথা ২৯ অক্টোবৰৰ পৰা মেঘালয়ৰ বিৰুদ্ধে অনিৰ্দিষ্টকালীন অৰ্থনৈতিক অৱৰোধ কাৰ্যসূচী গ্ৰহণ কৰাৰ হুংকাৰ দিয়ে সংগঠন কেইটাই ।
উল্লেখযোগ্য যে মেঘালয় চৰকাৰে ক’ভিড সংক্ৰমণৰ দোহাই দি অসমৰ লোকক মেঘালয়ত প্ৰৱেশ কৰিবলৈ বাধা দি আহিছে অথচ মেঘালয়ৰ যিকোনো লোকে কোনো বাধাৰ সন্মুখীন নোহোৱাকৈ অসমত প্ৰৱেশ কৰিছে ।
উল্লেখ্য যে এই সমস্যা সন্দৰ্ভত ইতিমধ্যে কে’বাটাও সংগঠনে ইতিমধ্যে গোৱালপাৰা জিলা উপায়ুক্তলৈ স্মাৰক পত্ৰ প্ৰেৰণ কৰিছে । কিন্তু মেঘালয় তথা অসম চৰকাৰে এই সমস্যা সমাধানৰ ক্ষেত্ৰত কোনো সঁহাৰি নিদিয়াত ক্ষোভত ফাটি পৰিছে আছু তথা অন্যান্য সংগঠন কেইটাৰ নেতাসকল ৷