কৃষি আইনক কেন্দ্ৰ কৰি দিল্লীৰ মুখ্য মন্ত্ৰী অৰবিন্দ কেজৰিৱাল আৰু পঞ্জাৱৰ মুখ্যমন্ত্ৰী অমৰিন্দৰ সিঙৰ বাকযুদ্ধই তুংগত উঠিছে । কৃষি আইনৰ সন্দৰ্ভত কেজৰিৱালে প্ৰশ্ন উত্থাপন কৰাৰ বিপৰীতে অমৰিন্দৰ সিঙে এই প্ৰসংগত বিৰোধীয়ে দুমুখীয়া ভুমিকা গ্ৰহণ কৰা বুলি মন্তব্য কৰিছে ।
উল্লেখযোগ্য যে সংবাদ মাধ্যমৰ আগত অমৰিন্দ সিঙে কয় যে কেন্দ্ৰৰ কৃষি আইন কেইখন অকাৰ্যকৰী কৰাৰ বাবে বিধানসভাত গৃহীত কৰা বিধেয়ক কেইখনক সমৰ্থন জনাইছিল আকালী আৰু আপে । অমৰিন্দ সিঙৰ এই মন্তব্যৰ পাছতে টুইটাৰ জৰিয়তে কেজৰিৱালে মন্তব্য কৰি কয় যে মুখ্যমন্ত্ৰী সিঙে নাটক কৰি জনসাধাৰণক মূৰ্খ সাজিছে আৰু তেওঁলোকক প্ৰতাৰণা কৰিছে ।
ইপিনে কেজৰিৱালৰ এই মন্তব্যৰ প্ৰত্যুত্তৰত অমৰেন্দ্ৰ সিঙে কয় যে আপ নেতাৰ এই মন্তব্যক লৈ আশ্বৰ্য হোৱা নাই, কিয়নো দিল্লী পূৰ্ণ ৰাজ্য নহয় । উল্লেখ্য যে বিগত দিনত লোকসভাত কেন্দ্ৰৰ কৃষি আইনক লৈ অভাৱনীয় পৰিস্থিতিৰ সৃষ্টি হৈছিল ।
এই আইনক বিৰোধ কৰাৰ কাৰণে একাংশ নেতাক লোকসভাৰ পৰাও বহিস্কৃত কৰিছিল ৷ যাৰ কাৰণে সমগ্ৰ নিশা সংসদৰ সন্মুখত প্ৰতিবাদ কৰিছিল সংসদৰ পৰা বহিস্কাৰ হোৱা নেতাসকলে ৷ আনহাতে পাঞ্জাৱ হাৰিয়ানাতো কৃষি আইনক লৈ ৰাহুল গান্ধীয়ে ৰেলীত অংশ লৈছিল ।