চিৰাঙত ড্ৰাগছৰ বিৰুদ্ধে আৰক্ষীৰ অভিযান অব্যাহত আছে ৷ ছাপাগুৰিত চিৰাং আৰক্ষী আৰু এচ এচ বিৰ যৌথ অভিযানত ড্ৰাগছসহ বিজনীৰ কাৱাটিকাৰ ছানোৱাৰ ৰহমান(২৪) নামৰ লোক জনক গ্ৰেপ্তাৰ কৰাৰ লগতে তেওঁৰ পৰা ৩০ ড্ৰাগছ ভৰ্তি প্লাষ্টিক কন্টেইনাৰ জব্দ কৰে ।
লগতে আৰক্ষীয়ে ছানোৱাৰ ৰহমানৰ পৰা এটা মোবাইল ফোন, দুটা ছিৰিঞ্জ, নগদ ৫০০/ টকা, এএচ ১৯ এম ৩৩৯৩ জব্দ কৰে । চিৰাং জিলা (সদৰ)ৰ অতিৰিক্ত আৰক্ষী অধীক্ষক প্ৰকাশ মেধীৰ নেতৃত্বত চলা অভিযানত বুধবাৰে নিশা এইসমূহ ড্ৰাগছ জব্দ কৰাৰ লগতে ছানোৱাৰক গ্ৰেপ্তাৰ কৰিবলৈ সক্ষম হয় ।
উল্লেখযোগ্য যে বিগত কিছুদিনৰ পৰা চিৰাং জিলাত আৰক্ষীয়ে ধাৰাবাহিক ভাবে ড্ৰাগছৰ বিৰুদ্ধে অভিযান অব্যাহত ৰাখিছে । ইপিনে বহু পৰিমাণৰ ড্ৰাগছৰ সৈতে কে’বাজনো লোকক গ্ৰেপ্তাৰ কৰি জেল হাজোতলৈ প্ৰেৰণ কৰিছে আৰক্ষীয়ে । কিন্তু ইয়াৰ পাছতো জিলাখনত নতুন নতুন পন্থাৰে ড্ৰাগছৰ ব্যৱসায় অব্যাহত ৰখা পৰিলক্ষিত হৈছে ।