বিদেশ মন্ত্রীয়ে কৈছিল ঃ ঈশ্বৰৰ শপত অভিনন্দনক যাবলৈ দিয়ক
ভাৰতৰ প্ৰত্যাক্ৰমণৰ ভয়তহে উইং কমাণ্ডাৰ অভিনন্দন বর্তমানক মুক্তি দিবলৈ বাধ্য হৈছিল ইমৰান খান চৰকাৰে। বিৰােধী দল পাকিস্তান মুছলিম লীগৰ নেতা তথা সাংসদ চৰ্দাৰ আয়াজ চাদিকে পাকিস্তানৰ সংসদত দিয়া এক বক্তৃতাত এই তথ্য প্রকাশ কৰে। বিৰােধী নেতাজনে বক্তৃতাত উল্লেখ কৰে যে বিদেশ মন্ত্রী শ্বাহ মেহমুদ কুৰেশ্বিয়ে ভাৰতৰ সম্ভাব্য আক্রমণৰ কথা জনাই অভিনন্দনক মুক্তি দিবলৈ গ্রহণ কৰা সিদ্ধান্তৰ কথা ঘােষণা কৰিছিল।
পাকিস্তানৰ সংসদৰ নিম্ন সদন নেচনেল এছেম্বলীত দিয়া বক্তৃতাত সাংসদ চাদিকে কয়, ভাৰতৰ আক্ৰমণৰ ভয়ত সেইদিনা পাক সেনাপ্রধান কমৰ জাভেদ বাজৱাৰ ভৰি থৰথৰাই কঁপিছিল । ইতিপূর্বে ইমৰান খান চৰকাৰে অভিনন্দনক ‘সৌজন্যতা’ৰ বার্তা দিয়াৰ উদ্দেশ্যেহে মুকলি কৰি দিয়া বুলি সদৰী কৰিছিল; কিন্তু সাংসদজনে স্বয়ং সংসদতে এনেদৰে ইমৰান খান চৰকাৰৰ মুখা খুলি দিয়ে।
উল্লেখ্য যে যােৱা বছৰৰ ২৬ ফেব্ৰুৱাৰীত পাকিস্তানৰ খাইবাৰ-পাখতুন যােৱা প্ৰদেশস্থিত বালাকোটত থকা জইছ-ই-মহম্মদৰ সন্ত্রাসবাদীৰ শিবিৰত ভাৰতীয় বায়ুসেনাৰ মিজ-২০০০ যুদ্ধ বিমানে বােমা বর্ষণ কৰিছিল । ইয়াৰ উত্তৰত ২৭ ফেব্ৰুৱাৰীত ভাৰতীয় আকাশ সীমা লংঘন কৰাৰ চেষ্টা চলায় পাক বায়ুসেনাই । সেই সময়ত পাকিস্তানৰ এফ-১৬ বিমানক মিগ-২১ বাইচন যুদ্ধ বিমান এখনৰে খেদি যায় উইং কমাণ্ডাৰ অভিনন্দন বর্তমানে। অভিনন্দনে এফ-১৬খনক খেদি যােৱাৰ সময়ত পাক অধিকৃত কাশ্মীৰত প্ৰৱেশ কৰে।
পাকিস্তানৰ আক্ৰমণত এটা সময়ত আহত অৱস্থাত পাক সেনাৰ হাতত বন্দী হয় অভিনন্দন। বক্তাক্ত অভিনন্দনৰ বহুকেইখন ছবি আৰু ভিডিঅ’ সংবাদ মাধ্যম তথা ছ’চিয়েল মিডিয়াত প্রকাশ কৰে পাক সেনাই। প্রায় ৬০ ঘণ্টাৰ অনিশ্চয়তাৰ পাছত পহিলা মার্চত অভিনন্দনক মুক্তি দিয়ে পাক সেনাই। ৱাঘা সীমান্তত ভাৰতীয় কর্তৃপক্ষৰ হাতত গতাই দিয়া হয় অভিনন্দনক ।
নেচনেল এছেম্বলীৰ অধ্যক্ষ হিচাপে ইতিপূর্বে কার্যনির্বাহ কৰা সাংসদ চাদিকে আৰু জনােৱা অনুসৰি, ভাৰতে বালাকোটত অভিযান চলােৱাৰ পাছত তথা অভিনন্দন বন্দী হােৱাত বিদেশ মন্ত্রী কুৰেশ্বিয়ে পাক সংসদৰ বিভিন্ন ৰাজনৈতিক দলৰ নেতাৰে বৈঠকত বহে। বৈঠকলৈ সেনাপ্রধান বাজৱাও আহিছিল যদিও প্রধানমন্ত্রী ইমৰান খানে অন্তিম সময়ত বৈঠকত উপস্থিত নথকাৰ সিদ্ধান্ত লয় ।
বৈঠকত নিজেও উপস্থিত থকাৰ অভিজ্ঞতা ব্যক্ত কৰি সাংসদ চাদিকে কয়, ‘মই সেইদিনাৰ বৈঠকত আছিলাে। স্পষ্টভাৱে মােৰ মনত আছে সেনাপ্রধান বাজৱাই যেতিয়া বৈঠকত প্রৱেশ কৰিছিল সেই সময়ত তেওঁৰ ভৰি কঁপিছিল। সেনাপ্রধানজনে প্ৰচুৰভাৱে ঘামিছিলাে ।
কুৰেশ্বিয়ে কৈছিল— ঈশ্বৰৰ শপত অভিনন্দনক যাবলৈ দিয়ক। তেওঁক এৰি নিদিলে আজি নিশা ১০ বজাত ভাৰতীয় সেনাই আমাক আক্রমণ কৰিব। অৱশ্যে অভিন্দনৰ মুক্তিৰ পাছত ইমৰান খানে প্রতিবেশীক সৌজন্যতাৰ বার্তা দিয়াৰ উদ্দেশ্যেহে এনে সিদ্ধান্ত লােৱা বুলি দাবী কৰিছিল।
ভাৰতীয় বায়ুসেনাৰ প্রাক্তন মুৰব্বী বি এছ ধন’ৱাই সাংসদ চাদিকৰ মন্তব্যৰ প্রতিক্রিয়া প্রকাশ কৰি কয়, অভিনন্দনক মুক্তি দিয়াৰ বাহিৰে পাকিস্তানৰ ওচৰত আৰু কোনাে পথ নাছিল । সেই সময়ত ভাৰতীয় বায়ু, নৌ আৰু স্থল সেনাই পাকিস্তানৰ বিৰুদ্ধে আক্রমণৰ বাবে সাজু আছিল । ১৯৯৯ত কার্গিল যুদ্ধৰ সময়ত বন্দী হােৱা বায়ুসেনাৰ পাইলট অক্ষয় আহুজাক হত্যা কৰিছিল পাক সেনাই ।
অভিনন্দনৰ পিতৃৰ প্ৰাক্তন সহকর্মী ধন’ৱাই আৰু কয়, “অভিনন্দন ধৰা পৰাৰ কথা জনাৰ সময়ত মই অভিনন্দনৰ পিতৃক প্রতিশ্রুতি দিছিলাে যে অজয়ক ওভতাই আনিব নােৱাৰিলাে, কিন্তু অভিনন্দনক ওভতাই আনিমেই।” কুৰেশ্বিয়ে যেতিয়া অভিনন্দনক মুক্তি দিয়াৰ কথা জনাইছিল সেই সময়ত বিৰােধীয়ে পূর্ণ সমর্থন জনােৱাৰ কথাও সাংসদ চাদিকে সদৰী কৰিছে, কিন্তু বর্তমান পাক চৰকাৰ অথবা সেনাপ্রধানক কোনাে অৱস্থাতে বিৰােধীয়ে সহযােগ নকৰে বুলি চাদিকে জনায়।
সম্প্রতি ইমৰান চৰকাৰক উৎখাত কৰিবলৈ বিৰােধী শক্তি সন্মিলিতভাৱে আগবাঢ়িছে। ইফালে, সাংসদ চাদিকৰ এই বক্তৃতাৰ পাছত বিজেপিৰ ৰাষ্ট্ৰীয় সভাপতি জে পি নড্ডাই কংগ্ৰেছ নেতা ৰাহুল গান্ধীৰ বিৰুদ্ধে সৰৱ হৈ পৰিছে ।
এক টুইট কৰি নড্ডাই কয়, কংগ্রেছ তথা ৰাহুল গান্ধীয়ে কোনাে কথাতে ভাৰতীয়সকলক বিশ্বাস নকৰে; কিন্তু এই কথা কোনাে ভাৰতীয় অথবা আমাৰ সেনা, আমাৰ চৰকাৰ, আমাৰ নাগৰিকে কোৱা নাই। কংগ্ৰেছৰ সবাতােকৈ বিশ্বাসযােগ্য ৰাষ্ট্র পাকিস্তানে কৈছে। আশা কৰিছাে ইয়াৰ পাছত ৰাহুল গান্ধীয়ে কিছু পােহৰ দেখা পাব।
কংগ্ৰেছে ভাৰতীয় সেনা বাহিনীক দুর্বল কৰাৰ প্রচেষ্টা চলাই আছে বুলি অভিযােগ কৰি নড্ডাই লগতে কয় যে সেনাৰ বীৰত্বক লৈও প্রশ্নৰ উত্থাপন কৰাত ৰাজনৈতিক শাস্তি হিচাপে দলটোক ভাৰতীয় জনগণে অগ্রাহ্য কৰিছে।
