“সদৌ অসম ছাত্ৰ সন্থা বা অসম জাতীয়তাবাদী যুৱ ছাত্ৰ পৰিষদে যি ৰাজনৈতিক দলৰ জন্ম দিছে আজিৰ প্ৰেক্ষাপটত ভাৰতীয় জনতা পাৰ্টিক কিবা প্ৰত্যাহ্বান সৃষ্টি কৰিব পাৰিব বুলি আমি নাভাবো ৷ ভাৰতীয় জনতা পাৰ্টিৰ এটা শক্তিশালী সাংগঠনিক পৰিকাঠামো আছে ৷ অসমৰ ভোটাৰ তালিকাৰ প্ৰতিটো পৃষ্ঠাৰ প্ৰতিগৰাকী ব্যক্তিৰ সৈতে সম্পৰ্ক কৰিবলৈ আমি আমাৰ কাৰ্যকৰ্তাসকলক দ্বায়িত্ব দিবলৈ সক্ষম হৈছোঁ ৷ পৃষ্ঠা প্ৰমুখ আমি নিযুক্তি দিছোঁ ৷ আগৰ কাৰ্যকালত ভাৰতীয় জনতা পাৰ্টিৰ মিত্ৰজোঁটৰ চৰকাৰ হোৱাটো নিশ্চিত ৷” এই মন্তব্য বিজেপিৰ ৰাজ্যিক মুখপাত্ৰ মনোজ বৰুৱাৰ ৷
বাক্সাৰ শালবাৰীত ভৱানীপুৰ উত্তৰ মণ্ডল বিজেপিৰ কাৰ্যালয় আনুষ্ঠানিক ভাৱে মুকলি কৰা অনুষ্ঠানত উপস্থিত থাকি সাংবাদিকৰ স’তে হোৱা এক আলোচনাত মনোজ বৰুৱাই কয়- বদৰুদ্দিন আজমলে যি বিষাক্ত ভাষণ আগবঢ়াইছে সেয়া গণতন্ত্ৰৰ পৰিপন্থী ৷ বদৰুদ্দিন আজমলে এনেবোৰ কথাৰে সস্তীয়া ৰাজনীতি কৰিছে ৷ আমাৰ হাজাৰ বছৰীয়া যি সভ্যতা, কৃষ্টি-সংস্কৃতি, ঐতিহ্য পৰম্পৰা, এই পৰম্পৰাই আমাক এনেকুৱা শব্দবোৰ উচ্চাৰণ কৰিবলৈয়ে নিশিকায় ৷ বদৰুদ্দিন আজমলক কঠোৰ ভাষাৰে সঁকিয়াই দিছো, অসমৰ সমাজ, অসমৰ সম্প্ৰীতি, অসমৰ ঐতিহ্য পৰম্পৰাৰ স’তে সম্পৰ্কিত নোহোৱা বক্তব্য যাতে অদূৰ ভৱিষ্যতে আজমলে নকৰে ৷
আনহাতে, আছুৰ উপদেষ্টা সমুজ্জ্বল ভট্টাচাৰ্যই আছুৰ পৰা অব্যাহতি ল’ব বুলি সোধা প্ৰসংগত বৰুৱাই কয়, সমুজ্বল ভট্টাচাৰ্যই দীৰ্ঘদিন ধৰি অসমৰ সমাজ জীৱনৰ স’তে সম্পৰ্কিত হৈ কাম কৰি আছে ৷ তেঁও যি সিদ্ধান্ত ল’ব সেইয়া ৰাইজৰ স্বাৰ্থতে ল’ব ৷ বৰুৱাই কয় ভাৰতীয় জনতা পাৰ্টিয়ে বিজেপি প্লাছ মিছন ১০০+ লৈ পুনৰ চৰকাৰ গঠন কৰিব ৷
ইফালে শালবাৰীত ভৱানীপুৰ উত্তৰ মণ্ডল বিজেপিৰ কাৰ্যালয় মুকলি কৰি সাংবাদিকৰে হোৱা আছুতীয়া সাক্ষাৎকাৰত বিজেপিৰ ৰাজ্যিক সভাপতি ৰঞ্জিত দাসে বিপিএফৰ মুৰব্বী হাগ্ৰামা মহিলাৰীৰ সন্দৰ্ভত মন্তব্য কৰি কয়- হাগ্ৰামাই জয়লাভ কৰিলে এমচিএলএ হৈ থাকক, পৰাজয় হ’লে সমাজ সেৱা কৰক, সন্যাসী হ’ব নালাগে, দেশৰ কাম, ৰাইজৰ কাম আৰু দলৰ কাম কৰি থাকক ৷ কেতিয়াবা ভাল দিন আহিলে ৰাইজে তেখেতক নিৰ্বাচিত কৰিব ৷
তেওঁ লগতে কয় ২০ নৱেম্বৰত বিপিএফৰ বিধায়ক ইমানুৱেল মুছাহাৰী বিজেপিত যোগদান কৰাটো নিশ্চিত হৈছে ৷ সাংসদ বিশ্বজিৎ দৈমাৰী বিজেপিত যোগদান কৰাৰো ইংগিত দিয়ে ৰঞ্জিত কুমাৰ দাসে ৷ ইপিনে, বিটিচিৰ বাহিৰৰ বড়ো সকলে বিধান সভা নিৰ্বাচনত বিজেপিক সহায় কৰিব বুলি দাবী কৰে ৰঞ্জিত কুমাৰ দাসে ৷